Երթը մեկնարկեց. Փաշինյանը հայտարարեց անխուսափելի հաղթանակի մասին (ԹԱՐՄԱՑՎՈՂ)

Քիչ առաջ «Իմ քայլը» նախաձեռնության առաջնորդ, ԱԺ պատգամավոր Նիկոլ Փաշինյանը համակիրների հետ միասին փակեց Ֆրանսիայի հրապարակը: Ցուցարարները շրջափակեցին նաև դեպի Մաշտոցի պողոտա բերող Մոսկովյան փողոցի հատվածը:

11.30

Ոստիկանները Ֆրանսիայի հրապարակում պատ են կազմել և քայլում են դեպի Բաղրամյան պողոտա: Հիշեցնենք, ցուցարարները Նիկոլ Փաշինյանի գլխավորությամբ այս պահին իջնում են Բաղրամյանով: Իրավիճակը լարված է:

11.24

Լուրեր կան, թե ոստիկանները Ֆրանսիայի հրապարակից բերման են ենթարկում ցուցարարների: Նիկոլ Փաշինյանը ցուցարարների ու երթի մասնակիցների հետ այս պահին վերադառնում է Ֆրանսիայի հրապարակ:

11.05

Երթը այս պահին հասել է ՀՀ նախագահի նախկին նստավայրի մոտ, որն այսուհետ լինելու է ՀՀ վարչապետի նստավայրը: Ոստիկանները շրջափակել են շենքը: Մեծ թվով ցուցարարները Բաղրամյան փողոցը արգելափակել են մինչև Պռոշյան խաչմերուկ: Նիկոլ Փաշինյանը կոչ արեց իր համակիրներին փողոցները շրջափակելիս ոչ մի առարկա, ոչ մի գույք չօգտագործել: Նրա խոսքով՝ իրենք այնքան շատ են, որ դրա կարիքը չկա:

***

Նախօրեին Փաշինյանը տեղեկացրել էր, որ հեղափոխությունը ցանցային բնույթ է կրելու և տարբեր հատվածներում են իրականացվելու գործողություններ: Երեկ երեկոյան Բաղրամյան պողոտայից հանվել է մետաղական փշալարը, ոստիկանական ուժեր այլևս տեղակայված չեն այնտեղ:

«Երեկվա բեկումնային իրադարձություններից հետո այլևս ոչ մի բան մեզ չի կանգնեցնի, և մեր հաղթանակն անխուսափելի է»,– հայտարարեց ընդդիմադիր գործիչը: Ըստ հայտարարած ծրագրի՝ այսօր ևս շարունակվելու են կառավարական շենքերը շրջափակելու ակցիաները։

Ինչ վերաբերում է գիշերը այդ հատվածում տեղի ունեցած անկարգություններին և ոստիկանության հետ բախումներին, Փաշինյանը նշեց, որ անկարգություն հրահրողներին չեն կարող իրենց հետ կապել, քանի որ տեղի ունեցածը սադրանք է եղել։ 

Նա նաև հայտարարեց, որ այսօր ժամը 19։00–ին դարձյալ հանրահավաք է տեղի ունենալու Հանրապետության հրապարակում։

Այս պահին երթը շարժվում է Բաղրամյան պողոտայով դեպի վերև: Հավաքը դառնում է բազմամարդ: