«Մուլտի Գրուպ» կոնցեռնի և շվեդական Omnia-Tech LLC-ի գործակցության արդյունքում Հայաստանում հիմնվել է կրիպտոարժույթի արտադրության աշխարհում ամենամեծ տեխնոպարկը:
Ինչպես տեղեկացնում են «Մուլտի Գրուպ» կոնցեռնից, առաջիկա երկու տարում նախատեսվում է կատարել շուրջ 2 միլիարդ դոլարի ներդրում այս ոլորտում, ինչի արդյունքում Գագիկ Ծառուկյանի ջանքերով կստեղծվեն 2000-3000 նոր աշխատատեղեր Հայաստանում: Նախագծի համաձայն՝ ապրիլից կսկսվի կրիպտոարժույթի համատեղ արտադրությունը: Բացի այդ, բլոկչեյն տեխնոլոգիաների հիման վրա կստեղծվեն նոր ծրագրեր՝ Հայաստանը դարձնելով ֆինանսական տեխնոլոգիաների հարթակ:
Ավելի վաղ VERELQ-ը տեղեկացրել էր, որ Կասպերսկի լաբորատորիայից զգուշացրել են, որ վնասաբեր կրիպտոմայներները սպառնում են Հայաստանի ընկերություններին: Նշվում էր, որ կիբեռհանցագործները սովորել են մայնինգի համար օգտագործել այլոց հաշվողական հզորությունները, այլոց համակարգչում կամ ցանցում աննկատ տեղադրելով մայնինգի համար նախատեսված ծրագրային ապահովում (մայներ)։ 2017թ. սեպտեմբերից մինչև 2018թ. փետրվարը կիբեռհանցագործները, նման կերպ մայնինգի ծրագրային ապահովում ներդնելով, ձեռք են գցել ավելի քան 7 մլն դոլար։
2018թ. մարտի սկզբի դրությամբ՝ «վնասաբեր մայներների» գրոհների ենթարկվել են աշխարհի 2,7 մլն օգտատերեր, ինչն ավելի քան 1,5 անգամ գերազանցում է 2016թ. ցուցանիշը, և այն շարունակում է աճել։ Եվ մայներների ներդրման նպատակով կիբեռհանցագործներին ավելի ձեռնտու է օգտագործել ոչ այնքան առանձին օգտատերերի համակարգիչները, այլ բազմաթիվ համակարգիչներ ներառող կորպորատիվ ցանցերը։
Հիշեցնենք, որ ՀՀ Կենտրոնական բանկը շատ այլ երկրների կենտրոնական բանկերի ու կառավարությունների նման հորդորում է քաղաքացիներին զերծ մնալ կրիպտոարժույթով գործարքներից, որոնք "շատ մեծ ռիսկեր են պարունակում"։
"Իհարկե, նման գործարքներ կատարելիս ամբողջ պատասխանատվությունն իրենց վրա է մնում՝ կախված բոլոր ռիսկերից՝ փողերի լվացում, ահաբեկչության ֆինանսավորում, հարկերից խուսափում, ոչ թափանցիկություն, տատանողականություն, ֆինանսական կորուստներ և այլն։ Մենք էլ ենք հորդորում հնարավորինս զերծ մնալ այդպիսի գործարքներից", - դեռեւս անցյալ տարի «Արմենպրես»-ի հարցազրույցում հայտարարել էր ՀՀ Կենտրոնական բանկի Ֆինանսական համակարգի կարգավորման վարչության պետ Մհեր Աբրահամյանը:
Մենք դիմեցից ԿԲ մեկնաբանություն ստանալու համար, սակայն մեզ հայտնեցին, որ այս պահին զերծ են մնում մեկնաբանություններից, քանի որ շուտով Կենտրոնական բանկը խնդրո առարկայի վերաբերյալ հանդես կգա հայտարարությամբ:
