Աշխարհի խնդիրների ուսումնասիրմամբ զբաղվող ստոկհոլմյան միջազգային ինստիտուտը՝ SIPRI-ն, երեկ հրապարակել է նոր զեկույց՝ աշխարհում զենք-զինամթերքի առք ու վաճառքի հետ կապված՝ 2013-2017 թվականների համար:
Համաձայն հրապարակված ինֆորմացիայի, Հայաստանը զենքի ներկրման ծավալով զբաղեցնում է 54-րդ տեղն աշխարհում: Նշվում է, որ 2 տարվա ընթացքում Հայաստանը ներկրել է զինամթերք՝ 124 միլիոն դոլար արժեքով, իսկ հիմնական երկիրը, որից գնվում է զենքը, Ռուսաստանն է:
«2016-2017 թվականների ընթացքում Հայաստանը ձեռք է բերել «Սմերչ» հրթիռային բազմակի համակարգի 6 միավոր, 200 միավոր «Վերբա» եւ «Կոռնետ» հակատանկային հրթիռային կոմպլեքսներ...»,- ասված է զեկույցում:
SIPRI-ի զեկույցում Հայաստանի հետ հակամարտող Ադրբեջանը զենքի ներկրման ծավալներով զբաղեցնում է 27-րդ տեղը: 2 տարվա ընթացքում Ադրբեջանը ձեռք է բերել 551 միլիոն դոլարի զենք-զինամթերք՝ հիմնականում Ռուսաստանից ու Իսրայելից:
Զեկույցի համաձայն՝ ընդհանուր առմամբ աշխարհում զենքի արտահանումը կենտրոնացած է մի քանի արեւմտյան երկրների ձեռքում։ Իսկ արեւելքում զենքի արտահանմամբ աչքի ընկնող երկրների ցանկում, բացի Թուրքիայից, տեղ են գտել նաեւ Իսրայելը եւ Հարավային Կորեան։ Զեկույցից հայտնի է դարձել, որ աշխարհում վաճառվող զենքի մեկ երրորդը մատակարարում է ԱՄՆ-ն։ ԱՄՆ-ից արտահանվող զենքի ծավալները վերջին հնգամյակում աճել են 25 տոկոսով, իսկ այդ սպառազինության ուղիղ կեսն ուղղվել է դեպի Մերձավոր Արեւելք։
Հենց Մերձավոր Արեւելքի տարածաշրջանում, որտեղ հատկապես վերջին տարիներին ռազմական գործողությունները հաճախակի են դարձել, զենքի վաճառքի ծավալները կրկնակի աճել են։ Զենքի հիմնական մատակարարներն այստեղ ԱՄՆ-ն եւ եվրոպական երկրներն են, իսկ տարածաշրջանում զենքի ամենախոշոր ներկրողը Սաուդյան Արաբիան է։
2013-2017թթ․ ընթացքում Սաուդյան Արաբիան 225 տոկոսով ավելի շատ զենք ու զինամթերք է ներկրել, քան նախորդ հնգամյակի ընթացքում։ Այս երկիրը զենքի երկրորդ ամենախոշոր ներկրողն է՝ աշխարհում՝ զիջելով միայն Հնդկաստանին։
Աշխարհի առաջատար զենք արտահանողների ցանկում ԱՄՆ-ին հաջորդում են Ռուսաստանը, Ֆրանսիան, Գերմանիան եւ Չինաստանը։ Այս երկրները մատակարարում են աշխարհում վաճառվող զենքի 74 տոկոսը։ SIPRI-ի զեկույցի համաձայն՝ աշխարհում վերջին հինգ տարում զենքի վաճառքի ծավալներն աճել են 10 տոկոսով։
