Լավրով. Մոսկվան անհեռատեսական է համարում ԱՄՆ-ի աջակցությունը Սիրիայի ընդդիմությանը

Մոսկվան անհեռատեսական է համարում Վաշինգտոնի կողմից Սիրիայի զինված ընդդիմությանն աջակցություն ցուցաբերելը: Նման հայտարարությամբ է հանդես եկել ՌԴ արտաքին գործերի նախարար Սերգեյ Լավրովը:

Լավրովը նշել է, որ ինչպես ցույց է տալիս վերջին տարիների փորձը այսպես կոչված չափավոր ընդդիմադիրների մեծ մասը, որոնք զենքի տեսքով օգնություն, ֆինանսավորում են ստանում և վերապատրաստում անցնում, հետագայում անցնում են ահաբեկիչների կողմը:

Մինչ այդ VERELQ հայտնել էր, որ Մերձավոր Արևելքի և Կենտրոնական Ասիայի երկրների հետազոտությունների կենտրոնի տնօրեն Սեմյոն Բաղդասարովի համոզմամբ, ԱՄՆ-ը և Թուրքիան օգտագործելու են ավիացիան Բաշար Ասադի ռեժիմի դեմ:

«Թուրքիան և ԱՄՆ-ը կարողացել են հավաքել կոալիցիա՝ Ջեյշ ալ-Ֆաթեհը, որի մեջ են մտնում մի շարք կառույցներ՝ Սիրիայի ազատ բանակը և Ջաբհատ ան-Նուսրան: Կոալիցիայի թվաքանակը հասնում է 25-30.000 մարդ: Հենց այդ կոալիցիային էլ ամերիկացիները և թուրքերը պատրաստվում են աջակցել օդից: Իսկ հաշվի առնելով, որ նրանք պայքարում են Ասադի դեմ, պարզ է, թե ում դեմ է օգտագործվելու թուրքերի և ամերիկացիների ավիացիան», - նշել է Բաղդասարովը:

Ըստ նրա, եթե Ասադին տապալեն, տարածաշրջանում կուժեղանան ԱՄՆ-ի, Թուրքիայի և Սաուդյան Արաբիայի դիրքերը: Օրինակ՝ Ռեջեփ Թայիփ Էրդողանը երազում է, որպեսզի Սիրիայում իշխանության գան «Մուսուլման-եղբայրները», որոնք իրենց հայացքները կուղղեն դեպի Թուրքիա և այնտեղ իշխող «Արդարություն և զարգացում» կուսակցությունը:

Սիրիայում 2011թ.-ի մարտից շարունակվում է ռազմական հակամարտությունը, որի ընթացքում, ըստ ՄԱԿ-ի տվյալների, զոհվել է ավելի քան 200.000 մարդ: Կառավարական ուժերին դիմագրավում են տարբեր ռազմական խմբավորումներին պատկանող մարտիկներ: Ամենաակտիվը Իսլամական պետության մարտիկներն են: