Մահապատժի ենթարկել այն հային, որը կոչնչացնի ՀՀ անկախությունն ու ինքնիշխանությունը. Ասրյան

Մահապատժի՛ ենթարկել այն հային, որն իրեն կվաճառի օտար պետության՝ փորձելով ոչնչացնել Հայաստանի անկախությունն ու ինքնիշխանությունը: Այս հայտարարությամբ հանդես է եկել «Հայոց Արծիվներ. Միասնական Հայաստան» կուսակցության նախագահ Խաչիկ Ասրյանը:

«Ցանկացած պետության ազգային, պետական շահը յուրաքանչյուր Հայի համար պետք է ավարտվի այնտեղ, որտեղ սկսվում է մեր Սուրբ Հայաստանի ազգային, պետական շահը. և՛ Հայաստանի իշխանությունը, և՛ Հայաստանի քաղաքական ընդդիմությունն ամեն օր՝ 24-ժամյա ռեժիմով, անհրաժեշտության դեպքում՝ նաև կյանքի գնով, պետք է ծառայեն Հայաստանի անկախությունն ու ինքնիշխանությունը պաշտպանելու, պահպանելու և հզորացնելու Սուրբ գործին՝ ցուցաբերելով բացառիկ պատասխանատվություն:

Այն հայը, որն իրեն կվաճառի օտար պետության և կփորձի ոչնչացնել Հայաստանի անկախությունն ու ինքնիշխանությունը, որպես Հայրենիքի դավաճան, պետական հանցագործ, պետք է ենթարկվի մահապատժի ու վե՛րջ»,- ասված է հայտարարության մեջ։