Տնտեսության մեջ գրանցվող աճերը հետագա ամիսներին կսկսեն դանդաղել. «ԼՈՒՅՍ» հիմնադրամ

2023 թվականին ՀՀ տնտեսությունում շարունակվում են պահպանվել նախորդ տարվա բարձր աճի ապահովման հիմնական գործոնների ազդեցությունները, ինչի արդյունքում գրանցվում է տնտեսական ակտիվության  բավական բարձր աճ: Սակայն, պետք է նշել, որ նախորդ տարի տնտեսական աճն արագացնող գործոնները (դրական արտաքին շոկերը) սկսեցին արտահայտվել մակրոտնտեսական ցուցանիշներում ապրիլ-մայիս ամիսներին, մինչդեռ 2023թ. հունվար-փետրվարը համեմատվում է նախորդ տարվա բնականոն (առանց դրական շոկի) ամիսների հետ: Այս մասին ասվում է «ԼՈՒՅՍ» հիմնադրամի՝ 2023թ. հունվար-փետրվար ամիսներին ՀՀ տնտեսության սոցիալ-տնտեսական զարգացումների ուսումնասիրության մեջ:

"Այս իրավիճակը հաշվի առնելով՝ կարող ենք նշել, որ գրանցվող աճերը հետագա ամիսներին կսկսեն դանդաղել, քանի որ կսկսենք համեմատել արդեն նախորդ տարվա այն ամիսների հետ, որոնցում առկա են դրական շոկի ազդեցությունները: Այնուամենայնիվ, 2023թ. փետրվարին գրանցվել է տնտեսական ակտիվության ցուցանիշի (ՏԱՑ-ի) արագացում, որը կազմել է 11.3%՝ հունվարի 10.5%-ի դիմաց: Կուտակային՝ հունվար-փետրվար ամիսների ՏԱՑ-ը կազմել է 10.9%, որը, սակայն, ցածր է նախորդ տարվա նույն ցուցանիշից շուրջ 0.5 տոկոսային կետով: 

Նշվում է, որ արդյունաբերության ոլորտում աճի տեմպը դանդաղել է` առանց այդ էլ ցածր մակարդակից: Ընթացիկ տարվա փետրվարին արդյունաբերության աճը կազմել է 0.7%՝ նախորդ ամսվա համեմատ դանդաղելով 0.7 տոկոսային կետով: Հունվար-փետրվար ամիսների աճը կազմել է բավական ցածր՝ 1.0%՝ զգալիորեն զիջելով ՏԱՑ-ի աճին:

Ինչ վերաբերում է պետական բյուջեի կապիտալ ծախսերի ցուցանիշներին, ապա դրանք ևս նորից մտահոգության տեղիք են տալիս։ 2023թ. հունվար-փետրվարին պետական բյուջեի կապիտալ ծախսերը նվազել են նախորդ տարվա նույն
ժամանակահատվածի նկատմամբ շուրջ 44.6%-ով։ Իհարկե, երկու ամսվա ցուցանիշները բավարար չեն կատարողականի վերաբերյալ դատողություններ անելու համար, սակայն նման բացասական դինամիկան արդեն իսկ հուշում է, որ
կատարողականի հետ կապված խնդիրներ լինելու են ընթացիկ տարում, և հավանական է, որ նախորդ տարիների կապիտալ ծախսերի ցածր կատարողականները արձանագրվեն նաև 2023-ին: 

Մանրամասն վերլուծությանը կարելի է ծանոթանալ այս հղումով