ՔՊ-ն պատրաստվում է նախընտրական քարոզարշավի. մեկնարկը՝ ԱԺ-ից

"Քաղաքացիական պայմանագիր" կուսակցությունը, կարծես, պատրաստվում է նախընտրական քարոզարշավի: 

Այդպես, Ազգային ժողովի պաշտոնական կայքից տեղեկանում ենք, որ ԱԺ նախագահի տեղակալները կընդունեն քաղաքացիների:

Խոսքը, մասնավորապես, Ռուբեն Ռուբինյանի մասին է, որը քաղաքացիներին կընդունի սեպտեմբերի 19-ին, ժամը 14:00-16:00-ը և Հակոբ Արշակյանի մասին, որի մոտ ընդունելությունը սեպտեմբերի 16-ին է ժամը 14Ւ00-16Ւ00-ը: Երկուսն էլ, հիշեցնենք, Նիկոլ Փաշինյանի ՔՊ-ից են:

Թե ինչո՞ւ են ԱԺ փոխնախագահները նման որոշում կայացրել ու փորձում վերադառնալ ժողովրդի գիրկը, որտեղից էլ, ըստ էության, 2018 թվականին քայլելով եկան իշխանության, պարզ չէ: Ի վերջո, առաջիկայում խորհրդարանական ընտրություններ նախատեսված չեն: Եվ նախկինում էլ, որքան հիշում ենք, ՔՊ-ական փոխնախագահները նման վարքագծով աչքի չեն ընկել, հակառակը՝ բավականին հեռվացել էին շարքային քաղաքացիներից:

Բայց կարելի է ենթադրել, որ Փաշինյանի թիմը պատրաստվում է ընտրությունների, բայց ոչ ՏԻՄ ընտրություններին, որոնք արդեն սեպտեմբերի 25-ին են: Այս դեպքում՝ Երևանի ավագանու ընտրությունների մասին է խոսքը, որին նրանք պատրաստվում են քաղաքապետի թեկնածու առաջադրել ՀՀ նախկին փոխվարչապետ Տիգրան Ավինյանին: Վերջինս, ի դեպ, հաջորդ շաբաթ արդեն իսկ Երևանի ավագանու կողմից կնշանակվի Երևանի փոխքաղաքապետ, իսկ այնտեղից մինչ ընտրություններ, ինչպես ասում են, "рукой подать": 

Դեռ ամռանը լուրեր էին շրջանառվում, որ ՔՊ-ն մտադիր է Երևանի ավագանու ընտրություններն անցկացնել արդեն այս աշնանը՝ արտահերթ, սակայն, թերևս, Արցախում շարունակ հանձնվող հայ բնակավայրերի ֆոնին մտավախություն կա, որ վարկանիշի լուրջ խնդիր կունենան և Երևանը պահել չի հաջողվի: Այդ իսկ պատճառով, հավանական է, որ ընտրությունները տեղի կունենան սահմանված ժամկետում՝ 2023 թվականի աշնանը: Իսկ մինչ այդ Տիգրան Ավինյանը, որի թեկնածության հետ կապված փաշինյանական թիմում, այդուհանդերձ, կան վերապահումներ, պետք է կարողանա ապացուցել, որ ինքն արժանի է ու կարող է լինել Երևանի քաղաքապետ: Բարդ գործ է, ի դեպ: 

Ինչ-ինչ, բայց ՔՊ-ում քաղաքապետացու շատ կա....