Հայաստանի իշխանությունները չեն կիսում «Հայ Դատի» ամերիկյան գրասենյակի դիրքորոշումը, որը ԱՄՆ պետքարտուղարությունից պահանջում էր վերանայել դեսպան Լին Թրեյսիի Հայաստանում գտնվելու նպատակահարմարությունը։ Այս մասին Factor TV-ի հետ զրույցում ասաց «Քաղաքացիական պայմանագիր» կուսակցության անդամ, ԱԺ արտաքին հարաբերությունների հանձնաժողովի նախագահ Էդուարդ Աղաջանյանը։
«Իշխանությունները, բնականաբար, չեն կիսում նման գնահատականները։ Կարծում եմ, որ այս պահանջն ուղղակիորեն կապված է Լին Թրեյսիի հայտարարության հետ Հայաստանում ժողովրդավարության հաստատմանն ուղղված գործընթացներում ԱՄՆ-ի աջակցության մասին»,- ասել է պատգամավորը։ Նրա խոսքով, Թրեյսիի այս հայտարարությունը կարևոր ուղերձ էր Հայաստանում տեղի ունեցող վերջին քաղաքական գործընթացների համատեքստում։ «Այն, ինչ վերջին շրջանում տեղի է ունենում Հայաստանում, ուղղակի երկիրը ժողովրդավարության զարգացման ուղղուց շեղելու փորձ է»,- ասել է նա։
Նա անտեղի համարեց Հայ Դատի այն հայտարարությունը, թե «Թրեյսին լուռ անցավ և անհիմն արհամարհանք դրսևորեց 44-օրյա պատերազմի և Հայաստանի ինքնիշխան տարածքի նկատմամբ Ադրբեջանի շարունակվող ոտնձգության ընթացքում տեղահանված ավելի քան 90000 արցախահայության նկատմամբ»։ Աղաջանյանի խոսքով, դեսպանն իր վերջին հայտարարության մեջ նշել է, որ Միացյալ Նահանգները ճանաչում է Լեռնային Ղարաբաղի բնակչության դերը նրա ապագան որոշելու հարցում։ «Սա վկայում է այս հարցում ԱՄՆ-ի կառուցողական դիրքորոշման մասին»,- ասաց նա։
Հայ դատի մեղադրանքները, թե Թրեյսին, լինելով ԱՄՆ դիվանագիտական ներկայացուցիչ, անտեսել է հայ ռազմագերիների խնդիրը, Աղաջանյանը նույնպես անհիմն է համարել. «Եթե հիշողությունս չի դավաճանում, ապա ԱՄՆ նախագահի միջնորդությամբ Հայաստան է վերադարձվել ռազմագերիների առաջին խումբը։ Եվ այստեղ, իհարկե, ԱՄՆ դեսպանն անմիջական և կարևոր դերակատարում ունեցավ այս գործընթացում, քանի որ հենց Լին Թրեյսին էր այն կարևոր և հիմնական խողովակը, որով ուղարկվում էին Հայաստանի ուղերձները ԱՄՆ»,- ասաց Աղաջանյանը։
Նկատենք, որ Աղաջանյանի հիշողությունն ակնհայտորեն դավաճանում է իրեն: Պաշտոնական տվյալներով հայ ռազմագերիների վերադարձի հարցում հիմնական միջնորդն էր Ռուսաստանը, որի միջնորդությամբ ապահովվեց ընդհանուր առմամբ 109 հայրենադարձությունը։ Ռազմագերիների առաջին 8 խմբերը վերադարձվել են ՌԴ միջնորդությամբ, ապա ԿԽՄԿ-ն ապահովել է 1 ռազմագերու վերադարձը, հետո ՌԴ միջնորդությամբ վերադարձվել է ևս 2 խումբ, և միայն դրան 2021 թվականի հունիսի 12-ին հաջորդել է 15 ռազմագերիների վերադարձը ԱՄՆ-ի և Վրաստանի միջնորդությամբ` ականապատ դաշտերի քարտեզի դիմաց, և դա դարձել է ԱՄՆ-ի մասնակցության միակ օրինակն այդ կարևոր հումանիտար հարցում:
