Հունվարի 22-ից 26-ը Ստրասբուրգում տեղի կունենա Եվրոպայի խորհրդի խորհրդարանական վեհաժողովի ձմեռային նստաշրջանը, որում ԵԽԽՎ-ն պետք է ընտրի նոր նախագահ, մարդու իրավունքների նոր հանձնակատար, ինչպես նաև ՄԻԵԴ դատավոր: Panorama.am-ի հաղորդմամբ՝ այս մասին գրում է ԵԽ կայքը: Վեհաժողովում ելույթով հանդես կգան Հայաստանի նախագահ Սերժ Սարգսյանը, Դանիայի արքայադուստր Մերին, Դանիայի ԱԳ նախարարը՝ որպես ԵԽ նախարարների կոմիտեում նախագահող, ինչպես նաև Դանիայի վարչապետն ու Ավստրիայի նախագահը: Ձմեռային նստաշրջանում ելույթ կունենա ԵԽ գլխավոր քարտուղար Թորբյորն Յագլանդը, մարդու իրավունքների հանձնակատար Նիլս Մյուժնիեկսն էլ վերջին անգամ կներկայացնի 2017թ.-ի իր գործունեության զեկույցը: ՀՀ նախագահ Սերժ Սարգսյանը վերջին անգամ ԵԽԽՎ-ում ելույթ էր ունեցել 2013 թվականի հոկտեմբերին, երբ Հայաստանը նախագահում էր ԵԽ նախարարների կոմիտեում:
