Վրաստանի խորհրդարանի նախագահ Դավիթ Ուսուպաշվիլիի Երևան այցի ընթացքում քննարկվել են երկկողմ հարաբերությունների բավականին լայն շրջանակ: Քննարկման հիմնական թեմաներից էր Վրաստանի և Հայաստանի համագործակցության հեռանկարները երկու հարևան երկրների՝ տարբեր ինտեգրացիոն միավորումներում մասնակցելու տեսանկյունից: Հայաստանը 2015 թվականի հունվարից հանդիսանում է Եվրասիական տնտեսական միության (ԵՏՄ) անդամ, իսկ Վրաստանը արդեն վավերացրել է Եվրամիության հետ Ասոցացման պայմանագիրը: Ինչպես տեղեկացնում եմ Հայաստանի խոհրդարանի մամլո ծառայությունից, Վրաստանի գործընկերոջ հետ փետրվարի 16-ին հանդիպման ժամանակ Հայաստանի Ազգային ժողովի նախագահ Գալուստ Սահակյանը վստահություն է հայտնել, որ առաջիկայում եւս կշարունակվեն երկու երկրների միջեւ արդյունավետ շփումները, կգտնվեն նոր ուղիներ բազմաբնույթ հարաբերությունների սերտացման համար: Ըստ Սահակյանի՝ Հայաստանի անդամակցությունը ԵՏՄ-ին որեւէ կերպ չի կարող խոչընդոտել հարեւան բարեկամ երկրների հետ հարաբերությունների զարգացմանը: Ըստ խորհրդարանի ղեկավարի՝ թեև միջազգային մի շարք հարցերում երկու երկրներն ունեն որոշ առումներով տարբերվող մոտեցումներ, սակայն տարածաշրջանային անվտանգության եւ կայունության ամրապնդման նպատակով Հայաստանը եւ Վրաստանը պարտավոր են հանդես գալ միասնաբար՝ փորձելով համատեղ ջանքերով դիմագրավել ընդհանուր մարտահրավերները: Այս առումով Գալուստ Սահակյանն անհրաժեշտ է համարել առավել խորացնել համագործակցությունը հատկապես միջազգային խորհրդարանական կառույցներում: Միևնույն ժամանակ ԱԺ նախագահը տեղեկացրել է, որ մարտի 16-ից 18-ը Երեւանում անցկացվելու է Եվրանեսթ միջխորհրդարանական վեհաժողովի լիագումար նիստը եւ նշել, որ ակնկալում է վրացի գործընկներների ակտիվ մասնակցությունը նիստին: Խոսելով ԵՏՄ-ին Հայաստանի անդամակցությունից՝ Սահակյանը տեղեկացրել է, որ այն Հայաստանի համար առեւտրատնտեսական նոր հնարավորություններ է բացում դեպի մեծ շուկա: «Այսօր Հայաստանի եւ Վրաստանի համար ստեղծվել է բացառիկ հնարավորություն: Մենք ունենք աննախադեպ պայմաններ` եվրասիական եւ եվրոպական առեւտրային հնարավորություններից միաժամանակ օգտվելու համար: Մեր երկրների քաղաքական որոշումների եւ աշխարհագրական բարենպաստ դիրքի շնորհիվ երկու երկրների արտադրողների համար ստեղծվել է հնարավորություն` ունենալ արտադրություն բարեկամ երկրում եւ միաժամանակ ներկայացված լինել եվրոպական կամ եվրասիական շուկաներում»,- նշել է խորհրդարանի ղեկավարը: Իր հերթին Վրաստանի խորհրդարանի նախագահ Դավիթ Ուսուպաշվիլին նույնպես կարեւորել է Հայաստանի հետ համագործակցության զարգացումն ու ընդլայնումը: Նա նշել է, որ Հայաստանի եւ Վրաստանի ընտրած ինտեգրման տարբեր ուղիները չպետք է խոչընդոտեն երկու երկրների հարաբերությունների զարգացմանը, ընդհակառակը, պետությունները պետք է կարողանան դա օգտագործել ի շահ երկու երկրների եւ ժողովուրդների: Ուսուպաշվիլին կարեւորել է տարածաշրջանում բարեկամական հարաբերությունները՝ ընդգծելով, որ խաղաղության պետք է հասնել ոչ թե պատերազմի միջոցով, այլ բանակցությունների ճանապարհով: Նա պատրաստակամություն է հայտնել միջազգային խորհրդարանական հարթակներում խորացնելու համագործակցությունը: Ուսուպաշվիլին նաեւ անդրադարձել է վիրահայերի խնդիրներին, որոնցից շատերը, ովքեր ժամանակին ձեռք են բերել Հայաստանի քաղաքացիություն, հայտնվել են բավական բարդ կացության մեջ: Վրաստանում 2014 թ. ԵՄ-ի հետ Ասոցացման համաձայնագրի և միգրացիայի ոլորտում համագործակցության շրջանակներում իրականացրած օրենսդրական խստացումները խնդիրներ են ստեղծել այլ երկրների քաղաքացիություն ունեցող վիրահայերի համար: Օրեսնդրական խստացումների պատճառով շատ վիրահայեր զրկվել են Վրաստանի քաղաքացիությունից և դարձել «օտարականներ» իրենց հայրենիքում: Ուսուպաշվիլիի Հայաստանում տեղի ունեցած հանդիպումների ժամանակ քննարկվել են նաև Հայոց ցեղասպանության 100-րդ տարելիցին նվիրված միջոցառումները և տարածաշրջանային անվտանգության հարցեր՝ մասնավորապես անդրադարձ կատարելով ղարաբաղյան հակամարտության խաղաղ կարգավորման գործընթացին: Կողմերը նշել են, որ խնդրի կարգավորումը պետք է տեղի ունենա բացառապես խաղաղ ճանապարհով: Անդրադառնալով Հայոց ցեղասպանության 100-ամյա տարելիցի միջոցառումներին՝ Դավիթ Ուսուպաշվիլին վստահեցրել է, որ այդ օրերին Վրաստանի խորհրդարանի պատվիրակությունը կգտնվի Հայաստանում: Այցի ընթացքում Ոսուպաշվիլին հանդիպել է նաև Հայաստանի արտաքին գործերի նախարար Էդվարդ Նալբանդյանի հետ: Անդրադառնալով մասնավորապես առևտրատնտեսական համագործակցությանը՝ կողմերը կարևորել են միջկառավարական հանձնաժողովի 10-րդ նիստի անցկացումը։ Նալբանդյանը և Ոսուպաշվիլին անդրադարձ են կատարել նաև տարածաշրջանային խնդիրներին: Հայաստանի արտգործնախարարը տեղեկացրել է ղարաբաղյան հիմնահարցի խաղաղ կարգավորման ուղղությամբ Հայաստանի և ԵԱՀԿ Մինսկի խմբի համանախագահ երկրների ջանքերը: