Եվրասիական տնտեսական հանձնաժողովի նավթի և գազի խորհրդատվական կոմիտեն հավանության է արժանացրել Եվրասիական տնտեսական միության երկրներում գազի ընդհանուր շուկայի ծրագիրը: ԵՏՀ մամուլի ծառայությունից հայտնում են, որ ծրագրում հաշվի են առնված ԵԱՏՄ անդամ պետությունների տնտեսական շահերը, ներառյալ՝ նրանց գազային շուկաների զարգացման և գործառնական յուրահատկությունները, ազգային օրենսդրության յուրահատկությունները: "Ընդ որում՝ գազի ընդհանուր շուկայի ձևավորումը ինտեգրացիոն համագործակցության կարևորագույն առաջնահերթություններից է»,- նշել է Եվրասիական տնտեսական հանձնաժողովի էներգետիկայի և ենթակառուցվածքների կոլեգիայի անդամ Ադամկուլ Ժունուսովը: Նշվում է, որ հավանության արժանացած փաստաթուղթը ներկայացնում է քայլերի համակարգի նկարագրություն, որոնք ուղղված են գազի ընդհանուր շուկայի միասնական գնային և սակագնային քաղաքականությանը:
