ՌԴ Կոմունիստական կուսակցության առաջնորդ Գենադի Զյուգանովը կարծում է, որ առանց Ռուսաստանի վարած ակտիվ քաղաքականության Անդրկովկասում ոչ մի հարց, այդ թվում՝ Ղարաբաղյան հակամարտությունը, չի կարող լուծվել։ Այդ մասին Զյուգանովն ասել է «Մոսկվա-Բաքու» պորտալին տված հարցազրույցում։ «Ռուսաստանը Ղարաբաղյան հակամարտության ուղղությամբ պետք է ավելի արդյունավետ աշխատի, փնտրի խաղաղ և խելամիտ լուծումներ։ Վստահ եմ՝ դրանք կան»,- ասել է նա։ Քաղաքական գործչի խոսքով՝ հակամարտության կարգավորման հարցում հետաքրքրված են բոլոր կողմերը։ Կոմկուսի առաջնորդը նաև ընդգծել է, որ Ռուսաստանը կարող է ավելի արդյունավետ քաղաքականություն վարել Հայաստանի ու Ադրբեջանի նկատմամբ։ Ի դեպ, դեկտեմբերի 23-ին կայանալիք կուսակցական համագումարում պարզ կդառնա՝ Գենադի Զյուգանովը կառաջադրի իր թեկնածությունը ՌԴ նախագահի պաշտոնում, թե ոչ։
