«Ինչպես արդեն նշել ենք, Հայաստանում ստվերից դուրս է բերվել կամ ստեղծվել է 50 հազար աշխատատեղ: Սրա հետ կապված երբ ես ելույթ ունեցա ԵԽԽՎ ամբիոնից, բազմաթիվ հրապարակային հայտարարություններ հնչեցին այն կապակցությամբ, որ կասկածի տակ է առնվում այդ թիվը»: Այս մասին ֆեյսբուքյան իր էջի ուղիղ եթերում հայտարարեց ՀՀ վարչապետ Նիկոլ Փաշինյանը՝ նշելով, որ նույնիսկ երբ ՊԵԿ-ը հանդես եկավ պարզաբանումով, շարունակվեցին նման քննարկումները: «Ես հանձնարարել էի փաստաթուղթ ներկայացնել, թե որտեղ եւ ինչպես են ձեռք բերվել այդ աշխատատեղերը: Իհարկե, մեծ մասը ստվերից դուրս բերված աշխատատեղեր են: Այստեղ էականն այն է, որ 2019 թվականի հունվարի 2018-ի համեմատ 50 հազարով ավել աշխատատեղ է գրանցվել Հայաստանում: Ինձ ներկայացրել են բացվածքը եւ այդ տեղեկանքը հիմա իմ ձեռքի տակ է եւ ես հերթով կներկայացնեմ թվերը: Օրինակ, մեծածախ եւ մանրածախ առեւտուր, մեքենաների եւ մոտոցիկլների նորոգում. Այս ոլորտում 2019-ի հունվարին 2018-ի համեմատությանմբ 16 հազար 427 աշխատատեղի աճ կա, մշակող արդյունաբվերություն՝ 9500 աշխատեղի աճ, հանրային սննդի կազմակերպում՝ 8334 տեղի աճ, սպասարկման այլ ծառայություններ՝ 5774 տեղի աճ, տեղեկատվության ոլորտում՝ 2600 տեղի աճ»: Ըստ ոլորտների շարունակելով, Նիկոլ Փաշինյանը հերթով ներկայացրեց 1 տարվա համեմատությամբ ավելացված աշխատատեղերի թիվը: Վարչապետը նաեւ հավելեց, որ որեւէ մեկը չպետք է կասկածի տակ առներ այդ թիվը, որովհետեւ ոչ թե կառավարությունն է գնացել հայտնաբերել այդ թիվը, այլ ընկերություններն իրենք են հայտարարագրվել: Եթե ահրաժեշտություն լինի, կարող են նաեւ ըստ ընկերությունների ներկայացնել աշխատատեղերը: «Ես սա համարում եմ մեր քաղաքացիների, մեր գործարարների իրավագիտակցությաբն բարձրացում եւ իրավիճակի նկատմամբ ըմբռման բարձրացում: Հայաստանում աշխատատեղերի թիվն ավելացել է 50 հազար 141-ով եւ սա իրական թիվ է»: