ԱՄՆ-ը մտահոգված է ղարաբաղյան հակամարտության գործում զորքերի շփման գծում լարվածության աճով: Այդ մասին հայտարարել է Ադրբեջանում ԱՄՆ-ի դեսպան Ռոբերտ Սեկուտան: Նա նշել է, որ ԵԱՀԿ Մինսկի խմբի համանախագահ Ջեյմս Ուորլիքը և նրա ռուսաստանցի և ֆրանսիացի գործընկերները զբաղվում են այդ հարցով: «Իրավիճակի փոփոխության համար մենք կողմերի հետ քննարկում ենք մեկ քայլ հետ կատարելու հարցը: Մենք չենք դիտարկում ղարաբաղյան հակամարտությունը, որպես սառեցված հակամարտություն: Եթե զոհվում են մարդիկ, այդ հակամարտությունը չի կարող համարվել սառեցված: Մենք աշխատում ենք կողմերի հետ հակամարտության խաղաղ կարգավորման համար: Բոլոր կողմերը պետք է միջոցներ ձեռնարկեն լարվածության թուլացման և հակամարտության կարգավորման համար», - փոխանցում է դիվանագետի խոսքերը ԱՊԱ-ն:
