ԵԱՏՄ նախագիծը Ռուսաստանի նախաձեռնությունը չէ. ՌԴ փոխվարչապետ
Ռուսաստանի Դաշնության առաջին փոխվարչապետ Իգոր Շուվալովը հայտարարել է, որ Եվրասիական տնտեսական միությունը քաղաքական պրոեկտ չէ և Ռուսաստանի նախաձեռնությամբ չէ, որ իրագործվում է: Այս մասին հաղորդում է EADaily-ն:
Նա հիշեցրել է, որ ԵԱՏՄ-ն տնտեսական միություն է:
«Նախագիծը ծնվել է դեռ 1990-ականների սկզբին Ղազախստանի նախագահ Նուրսուլթան Նազարբաևի նախաձեռնությամբ, ով հանդես եկավ եվրասիական ինտեգրման գաղափարով», — նշել է նա: Ելնելով այդ հանգամանքից, ավելացրել է Շուվալովը, ցանկացած հայտարարություն այն մասին, թե Եվրասիական տնտեսական միությունը «պարտադրված է» Ռուսաստանի կողմից, ոչ այլ ինչ են, քան շահարկում և սուտ:
Պաշտոնյան նշել է, որ ինտեգրացիոն միության ստեղծման մասին համաձայնագրի ստորագրումից հետո, դրական արդյունքներին զուգահեռ, մնացել են նաև շատ խնդիրներ: Խոսքը, մասնավորապես, բազմաթիվ խոչընդոտների մասին է, որոնք խանգարում են փոխադարձ առևտրի զարգացմանը: Այս խնդիրները շտկելու ուղղությամբ, ասել է նա, շատ ծանր աշխատանք է տարվում, որը շատ ժամանակ ու ջանք է պահանջում:
