«Հայաստան» դաշինքը պահանջում է քննարկել Սյունիքում ադրբեջանցիների գործողությունները

Անցած օրերին մենք կրկին ականատես եղանք ադրբեջանական զինված ուժերի հերթական անօրինական գործողություններին և Հայաստանի իշխանությունների հլու-հնազանդ դիրքորոշմանը։ Այս մասին այսօր՝ սեպտեմբերի 13-ին, հայտարարել է ’Հայաստան’ խմբակցության քարտուղար Արծվիկ Մինասյանը։

Նրա խոսքով՝ ԱԱԾ "անատամ ու անբովանդակ" հայտարարությունը չի բխել Հայաստանի ազգային անվտանգության շահերից։ «Ավելին, մենք այդպես էլ չտեսանք իշխանությունների կողմից ստեղծված իրավիճակի վերաբերյալ որևէ քայլ, պարզաբանումներ և հիմնավորումներ»,-հայտարարեց Մինասյանը:

Հիշեցնելով, որ Հայաստանը խորհրդարանական երկիր է՝ Մինասյանն ԱԺ խոսնակին կոչ արեց որոշել ձևաչափը և կազմակերպել ստեղծված իրավիճակի քննարկումները: «Մենք պետք է հասկանանք, թե ի վերջո ինչ է կատարվում, հատկապես հաշվի առնելով այն հանգամանքը, որ Հայաստանի ԱԱԾ-ն սկսել է ամբողջությամբ օգտագործել ադրբեջանական տերմինաբանությունը», - հայտարարել է Մինասյանը:

«Հայաստան» խմբակցության անդամ Գեղամ Մանուկյանը կոչ արեց քննարկման հրավիրել ԱԱԾ տնօրենին: Նա հետաքրքրվեց, թե ինչպես է ԱԺ նախագահը վերաբերվում այդ առաջարկին։

ԱԺ նախագահ Ալեն Սիմոնյանը չի բացառել նշված քննարկումների անցկացման հնարավորությունը: «Պաշտոնն ստանձնելու առաջին օրվանից ես աշխատել եմ նման առաջարկները բավարարելու հնարավորության համար։ Ինչպես և կոչ է արել պարոն Մինասյանը, մենք կքննարկենք ձեւաչափը եւ ամենայն ավանականությամբ քննարկումներ տեղի կունենան», - հավաստիացրել է ԱԺ նախագահը:

Նշենք, որ երեկվանից ադրբեջանական կողմը Սյունիքի մարզում ստուգումներ է իրականացնում Հայաստան ուղևորվող իրանական բեռներով։

«ՀՀ Ազգային անվտանգության ծառայությունը տեղեկացնում է, որ սեպտեմբերի 12-ին ՝ ժամը 12:00-ից, Ադրբեջանի վերահսկողության տակ գտնվող Էյվազլի գյուղի հատվածում գտնվող Գորիս-Կապան միջպետական ճանապարհի Որոտան գյուղի հատվածում, ժամը 12: 00-ից, Ադրբեջանի ոստիկանությունը ստուգում է իրանական համարանիշներով մեքենաների վարորդների և բեռների փաստաթղթերը:

ՀՀ Ազգային անվտանգության ծառայության սահմանապահ զորքերը և Ռուսաստանի Անվտանգության դաշնային ծառայության սահմանապահ ծառայության զինծառայողները համատեղ աշխատանքներ են իրականացնում իրավիճակի կարգավորման ուղղությամբ», - ասված է պարզաբանման մեջ: