Եվրամիությոնը Հայաստանին առաջիկա 5 տարիների համար կհատկացնի 2,6 մլրդ եվրո։ Նման տպավորիչ ֆինանսավորման նպատակն է համատեղ մշակված ներդրումային և տնտեսական նախագծերի իրականացումը։ Այս մասին հայտնում է ՀՀ փոխվարչապետ Մհեր Գրիգորյանի խորհրդական Մանե Ադամյանը՝ հղում անելով ԵՄ հանձնակատար Օլիվեր Վարհենի խոսքերին:
«Պաշտոնական այցով Երևանում գտնվող ԵՄ հանձնակատար Օլիվեր Վարհենն այսօր հայտարարեց, որ Արևելյան գործընկերության շրջանակում համատեղ մշակված Տնտեսական և ներդրումային պլանի ներքո տարբեր ֆինանսական գործիքներով ՀՀ-ին տրամադրվելիք 1,6 մլրդ եվրո աջակցությունից զատ, այլ աղբյուրներով կմոբիլիզացվի հավելյալ 1 մլրդ եվրո` ընդհանուր ներդրումային փաթեթը դարձնելով 2,6 մլրդ եվրո», - ֆեյսբուքյան իր էջում գրել է Մանե Ադամյանը:
Եվրոպական հարևանության քաղաքականության և ընդլայնման հարցերով հանձնակատար Օլիվեր Վարհեն ՀՀ փոխվարչապետ Մհեր Գրիգորյանի հետ համատեղ մամլո ասուլիսում հայտարարել է, որ ԵՄ-ն շարունակում է մնալ բարեփոխումների իրականացման Հայաստանի գլխավոր գործընկերը: Նա բարձր է գնահատել Հայաստանի կառավարության պատրաստակամությունը՝ իրականացնելու նախանշված բարեփոխումները։
Նա տեղեկացրել է, որ Երևանում քննարկելու է COVID-19 համավարակը, Արցախում վերջին մարտական գործողությունները և շնորհավորել ՀՀ կառավարությանը արտահերթ խորհրդարանական ընտրություններում վերընտրվելու կապակցությամբ:
ԵՄ հանձնակատարը նշել է, որ Հայաստանն այլևս հնարավորություն չունի ժամանակ բաց թողնել տնտեսական զարգացման համար, ուստի բոլոր քաղաքացիները պետք է անպայման պատվաստվեն:
Եվրահանձնակատարը ցավակցություն է հայտնել արցախյան վերջին պատերազմի զոհերի կապակցությամբ եւ հայտնել, որ ԵՄ-ն 9-10 մլն եվրո է հատկացրել մարտական գործողություններից տուժածներին աջակցելու համար, եւ ԵՄ-ն պատրաստակամություն է հայտնել շարունակել աջակցությունը պատերազմից հետո երկրի վերականգնմանը:
Վարհեն զարգացման ծրագիր կներկայացնի հետպատերազմյան շրջանում, որը կօգնի հնարավորինս շուտ վերականգնել երկրի աշխատատեղերն ու տնտեսությունը։ Նա ընդգծել է, որ ԵՄ-ն մտադիր է առեւտրային կապերի ուղիներ ստեղծել, որոնք հնարավորինս շուտ տարածաշրջանը կկապեն ԵՄ-ի հետ: Դրա համար ԵՄ-ն շուրջ 10 մլրդ դոլար կհատկացնի ողջ տարածաշրջանին։
Հայաստանի համար ԵՄ-ն առաջարկում է հինգ ծրագիր, որոնք կարող են փոխել իր քաղաքացիների կյանքը։ Դրանց իրացման համար հինգ տարում կհատկացվի 2.6 մլրդ եվրո։
