Անհետ կորած զինծառայողների վերաբերյալ հնչող թվերը հակասական են. Արցախի ՆԳ նախարար

Անհետ կորած զինծառայողների վերաբերյալ՝ հատկապես ենթադրությունների մակարդակով, հնչում են թվեր, որոնք իրականությանը չեն համապատասխանում: Այս մասին «Արցախպրես»-ի հետ զրույցում ասել է Արցախի Հանրապետության ներքին գործերի նախարար, «Գերիների, պատանդների և անհետ կորածների» հարցերով հանձնաժողովի նախագահ Կարեն Սարգսյանը:

«Տվյալները հակասական են: Զինադադարից անմիջապես հետո իմ անմիջական նախաձեռնությամբ Ստեփանակերտում ստեղծեցինք օպերատիվ շտաբ և հավաքագրեցինք անհետ կորած զինծառայողների տվյալները: Մեր որոնողական աշխատանքների ընթացքում հայտնաբերված զինծառայողների աճյունների տարհանման արդյունքում անհետ կորած զինծառայողների մասին տեղեկության սպասողների թիվը նվազել է»,- ասել է Կարեն Սարգսյանը՝ նշելով, որ մինչ այսօր հայտնաբերված 1586 աճյունները մեծամասամբ անհետ կորած զինծառայողների ցուցակի անուններ են:

Նրա հավաստմամբ՝ Ադրբեջանական հսկողության ներքո գտնվող տարածքներից հայ զինծառայողների աճյունների տարհանման, ինչպես նաև գերիների ու պատանդների վերադարձման գործընթացում, Արցախի ներքին գործերի նախարարության համապատասխան ստորաբաժանումները պատրաստ են ցանկացած փորձության՝ նույնիսկ հակառակորդի միջանձնային և էթնոազգային վատ հարաբերությունների ու վերաբերմունքի առկայության պարագայում:

«Եթե անկեղծ լինեմ, որոնողական աշխատանքների առաջին օրերին ադրբեջանցիների կողմից նկատվել է ակնհայտ թշնամական վերաբերմունք: Այնուհետև, երբ արդեն հաճախակի են դարձել հանդիպումները, այդ հարաբերություններում փոփոխություն է եղել, որը միայն օգուտ է տվել մեր աշխատանքին»,- հայտնել է գերատեսչության ղեկավարը:

ՆԳ նախարարի խոսքով՝ գերիների, պատանդների և անհետ կորածների, ինչպես նաև Ադրբեջանի հսկողության տակ անցած տարածքներում աճյունների որոնումների իրականացման հարցերով՝ իր ղեկավարած հանձնաժողովը լայն ու բազմաբովանդակ համագործակցություն է ձևավորել:

«Գերիների, պատանդների և անհետ կորածների հարցերով հանձնաժողովը ակտիվ համագործակցում է ՌԴ խաղաղապահ առաքելության զորակազմի, Արցախի պաշտպանության նախարարության, Կարմիր խաչի միջազգային կոմիտեի, Մարդու իրավունքների պաշտպանի և Մարդու իրավունքների եվրոպական դատարանի հետ»,- ասել է Կ. Սարգսյանը՝ արդյունավետ գնահատելով համատեղ կատարված աշխատանքը: