ՌԴ-ում կմեկնարկեն բանակցություններ՝ գերեվարված զինծառայողների վերադարձի հարցով. Ավագյան

Վաղը ՌԴ-ում կմեկնարկեն եռակողմ բանակցություններ՝ գերեվարված զինծառայողների վերադարձի հարցով։ Այս մասին «Փաստինֆո»-ի հետ զրույցում տեղեկացրել է Խծաբերդից գերեվարված շիրակցի զինծառայողների վերադարձի հարցերով զբաղվող Բորիս Ավագյանը։

«Վաղը լինելու են եռակողմ բանակցություններ ՌԴ ՊՆ-ում, որին մասնակցելու են ՀՀ Պաշտպանության նախարարության և ադրբեջանական կողմի ներկայացուցիչները, նաև գեներալ Մուրադովը։ Այդ բանակցություններից հետո հնարավոր կլինի տալ գնահատականներ, թե իրավիճակն ինչպես է ընթանում։ Խծաբերդից գերեվարվածների հարցը ընդհանուր ծրագրի մեջ է»,- ասել է նա։

Ավագյանը հույս է հայտնել, որ հանդիպումից հետո գերիների վերադարձի գործընթացը կարագանա՝ նշելով, որ մեծ հույսեր ունի հատկապես ՌԴ աջակցության վրա։

Ըստ նրա՝ վաղը կայանալիք բանակցություններում կքննարկվի նաև ՀՀ տարածքից գերեվարված վեց զինծառայողների վերադարձի հարցը, պահանջներից մեկը լինելու է, որ վերջիններս անհապաղ վերադարձվեն ՀՀ։

«Պահեստազորայինները պետք է անհապաղ վերադարձվեն ՀՀ տարածք։ Բանակցությունները վարվում են ՌԴ միջնորդությամբ՝ անձամբ Գեներալ Մուրադովի մասնակցությամբ։ Նրանք առանց նախապայմանի պետք է վերադարձվեն ՀՀ»։

Ավագյանը նշել է, որ տղաների մասին տեղեկություններ են ստացվել, հայտնի է նաև նրանց գտնվելու վայրը՝ զինծառայողները պահվում են Բաքվում։

Զինվորները գերեվարվել են ՀՀ տարածքից՝ Գեղարքունիքից՝ մայիսի 27-ին։

ՌԴ-ում եռակողմ բանակցություններում Բորիս Ավագյանը ներկա չի լինելու, քանի որ Հայաստանը վերջինիս նման մանդատ չի տվել, սակայն նշել է, որ գերեվարված զինծառայողների հարազատների հետ մշտական կապի մեջ է։ Վերջիններս արձագանքել են, պատմել բոլոր խնդիրների մասին ու պահանջել, որ իշխանությունները տան այնպիսի մանդատ, որպեսզի Ավագյանը կարողանա բանակցել եռակողմ բանակցությունների ժամանակ, բայց մինչև օրս ՀՀ իշխանությունները չեն արձագանքել։