Ուկրաինայի Լվով քաղաքում ընթացող Եվրոպայի Քունկ ֆուի առաջնության ժամանակ ադրբեջանցիները ներխուժել են ռինգ և փորձել հաշվեհարդար տեսնել մենամարտը հաղթող արցախցի մարզիկի հետ: Այս մասին VERELQ-ին պատմել է Քունկ ֆուի Հայաստանի ֆեդերացիայի նախագահ Սարգիս Հարությունյանը:
Նրա խոսքով, հայ մարզիկներից
Աշոտ Հարությունյանը մենամարտել է ադրբեջանցի մարզիկի հետ ու պարտության մատնել նրան, բացի այդ մեկ այլ մենամարտում ևս մրցակիցները եղել են հայ և ադրբեջանցի: Այստեղ է, որ ադրբեջանցիների նյարդերը տեղի տվեցին:
«Մրցապայքարի վերջում, երբ ակնհայտ էր արցախցի մարզիկ
Դավիթ Պետրոսյանի հաղթանակը, Ադրբեջանի թիմի մարտավկան փորձեց հարվածել մեր մարզիկին: Սադրանքին միացավ նաև ադրբեջանցի մարզիկը, որը ռինգում թիկունքից հարվածեց Դավիթ Պետրոսյանին: Այնուհետև ադրբեջանական թիմի մարզիչներն ու մարզիկները` մոտ 30-ից ավելին մեծահասակ, մահակներով հարձակվեցին մեր հավաքականի թվով 11 տղաների վրա, որից 7-ն անչափահաս են: Այդժամ նույնիսկ մեր 12- ամյա մարզիկը կռիվ տվեց իրենից 3-4 անգամ մեց ազերիների հետ, անտեսելով, որ նա իրենից մեծ է»,- պատմեց Սարգիս Հարությունյանը:
Ֆեդերացիայի նախագահի խոսքով՝ այս ամենը կարծես ծրագրված լիներ, քանզի այլ կերպ չես բացատրի, թե ինչու էին ազերիներն իրենց հետ մահակներ բերել դահլիճ: Ի դեպ, ոչ միայն մարտադաշտում, այլև ռինգում պարտությունից կատաղած մեջ հայտնված ադրբեջանցիները նույնիսկ հարվածել են Եվրոպայի Քունկ Ֆուի ֆեդերացիայի նախագահ
Նիկոլայ Մատուլյովսկուն, ով փորձել է մարմնով փակել արցախցի 12-ամյա մարզիկին:
«Ծեծկռտուքին միջամտեցին անվտանգության աշխատակիցները: Իսկ նման անվայել պահվածքի համար ադրբեջանական թիմը նկատողություն է ստացել ու որակազրկվել, քանի որ ադրբեջանցի մարզիկներն ու մարզիչներն աշխարհի աչքի առաջ իրենց գռեհիկ պահվածքով վարկաբեկեցին մարզական աշխարհի հեղինակությունն ու անցկացվող առաջնությունը»,- հավելեց Հարությունյանը:
Ավելացնենք, որ արցախցի մարզիկն ապրիլյան պատերազմի ժամանակ ադրբեջանական 5 տանկ և 1 ՀՄՄ խոցած ժամկետային զինծառայող
Մարատ Պետրոսյանի ավագ եղբայրն է: Նշենք, որ առաջնությունը կայացել է Ուկրաինայի Լվով քաղաքում մայիսի 12-15-ն ընկած ժամանակահատվածում:
Հիշեցնենք, որ անցյալ տարի այս օրերն՝ մայիսի 19-ին, Թբիլիսիում ավարտված շոտոկան կարատեի միջազգային մրցման ժամանակ բախում էր տեղի ունեցել ադրբեջանցի մարզիկների եւ Վրաստանը ներկայացնող հայազգի մարզիկների միջեւ: Հայաստանը ներկայացնող մարզիկները որեւէ առնչություն չունեն այդ միջադեպի հետ: Իսկ պատճառը եղել է զուտ սպորտային, մենամարտի ժամանակ որոշակի անհամաձայնության պատճառով:
