Հունվարի 25-ին ՀՀ ԱԳ նախարար Արա Այվազյանը հեռախոսազրույց ունեցավ ՅՈՒՆԵՍԿՕ-ի Գլխավոր տնօրեն Օդրի Ազուլեի հետ։ Այդ մասին հայտնում են ԱԳՆ-ի մամուլի ծառայությունից:
Զրուցակիցներն հերթական անգամ անդրադարձ կատարեցին ԼՂ հակամարտության գոտում հայկական պատմական, կրոնական ժառանգության պահպանման հարցերին և այդ համատեքստում ՅՈՒՆԵՍԿՕ-ի հետ համագործակցության հեռանկարներին: Նախարար Այվազյանը նշեց, որ հայկական պատմամշակութային կոթողները տարածաշրջանի հարուստ ժառանգության անբաժան մասն են կազմում՝ դրանց պաշտպանության ուղղությամբ ակնկալելով ՅՈՒՆԵՍԿՕ-ի ակտիվ ներգրավվածությունը:
Նախարար Այվազյանն ընդգծեց Արցախի՝ ադրբեջանական վերահսկողության ներքո հայտնված տարածքներում հայկական պատմամշակութային, կրոնական ժառանգության պահպանության ուղղությամբ քայլերի ձեռնարկման հրատապությունը, որն առավել ընդգծվում է հայկական ժառանգության դիտավորյալ ոչնչացման և դրանց ինքնության խեղաթյուրման ուղղությամբ ձեռնարկվող քայլերի ֆոնին։
Ողջունելով ՅՈՒՆԵՍԿՕ-ի փաստահավաք առաքելություն ուղարկելու որոշումը՝ Հայաստանի արտաքին քաղաքական գերատեսչության ղեկավարն ընդգծեց Արցախի հայկական մշակութային ժառանգության համամարդկային կարևորությունը՝ անընդունելի համարելով դրանց պաշտպանության հարցի քաղաքականացումը և այդ գործընթացում արհեստական խոչընդոտներ ստեղծելու ադրբեջանական կողմի պրակտիկան:
Սպասում էին Ադրբեջանի իշխանությունների պատասխանին
Որպեսզի ՅՈՒՆԵՍԿՕ-ն առաքելություն ուղարկի վայր, պակասում է միայն Ադրբեջանի պատասխանը։ Այս մասին 2020 թվականի դեկտեմբերի 21-ին հայտարարել Է ՅՈՒՆԵՍԿՕ-ի մշակույթի հարցերով գլխավոր տնօրենի տեղակալ Էռնեստո Օտտոնեն՝ հավելելով, որ կազմակերպությունում արդեն մեկ անգամ չէ, որ դիմել են Ադրբեջանի իշխանություններին, սակայն ապարդյուն։
2020 թվականի դեկտեմբերի 10-11-ը Կոնվենցիայի կատարման միջկառավարական կոմիտեն հաստատել է Լեռնային Ղարաբաղում եւ հարակից շրջաններում մշակութային օբյեկտների վիճակի անկախ գնահատման անհրաժեշտությունը: Կոմիտեի անդամները դիմել են Հայաստանին և Ադրբեջանին՝ խնդրելով աջակցել այդ խնդրի իրականացմանը։ Բանն այն է, որ 1954 թվականի կոնվենցիայի պայմաններով նման պատվիրակություն ուղարկելու համար անհրաժեշտ է երկու կողմերի համաձայնությունը։
Էռնեստո Օտտոնեի խոսքով՝ յուրաքանչյուր շաբաթ իրավիճակը բարդանում է, այդ թվում՝ եղանակի վատթարացման պատճառով:
«Պահպանություն [մշակութային] ժառանգության դա կարևոր նախապայման է պահպանել կայուն խաղաղություն, – ասել է ղեկավարի տեղակալ ՅՈՒՆԵՍԿՕ-ի կողմից: - Մենք հուսով ենք, որ Բաքուն անհապաղ պատասխան կտա, որը թույլ կտա գործի դնել այն կառուցողական քննարկումները, որոնք տեղի են ունեցել վերջին շաբաթների ընթացքում»:
