Պատերազմի 44 օրերի ընթացքում սուտը, ստի տարածումը ոչ թե օգուտ է բերել մեր երկրին, այլև քայքայել է ու մեր երկիրը տարել է ավելի խորը ճգնաժամի: Այս մասին ասուլիսում հայտարարեց ՀՀ ՊՆ ռազմական վերահսկողական ծառայության նախկին պետ, գեներալ-գնդապետ Մովսես Հակոբյանը:
«Զինված ուժերի ինֆորմացիոն կենտրոնի խնդիրներից մեկն է հակառակորդին մոլորության մեջ գցելը՝ սուտ տեղեկատվության տարածմամբ: Այնտեղ կա մի չափանիշ, որ սուտը չպետք է գերազանցի իրականության 30 տոկոսը, սակայն մեր սուտը գերազանցել է 100 տոկոսը: 100 տոկոս սուտը որևէ մեկի մոտ ընկալելի չէ: Դրանից են ծնվում հարցերը՝ հասարակությունը, կռված տղաները չեն հասկանում, թե ինչու այսպես ստացվեց», - ասաց նա:
Թե ինչու պարտվեցինք այս պատերազմում, Մովսես Հակոբյանը մի քանի պատճառ բերեց: Նախ, ըստ նրա, ղեկավարումն է պատճառը.
«Մեր բոլոր անհաջողությունները սկսվել են մեր ԶՈՒ նախապատրաստումից պատերազմին»,- շեշտեց նա:
Բացի այս, վերջին տարիներին Զինված ուժերում այսպես կոչված օպտիմալացումը, որի շրջանակում կրճատվել է հինգ գունդ, որը ներառում էր ամբողջ սպայական կազմը՝ հրետանիով, կապի միջոցներով, ամեն ինչով, բացի զինվորներից: Նաև Արցախի պաշտպանական շրջաններում կրճատվել են գումարտակներ և սա այն դեպքում, ասաց գեներալը, երբ դրանք պետք է ավելանային:
Ի դեպ, նա անդրադարձավ նաև իրեն փոխարինած Արտակ Դավթյանի նշանակմանը, ասելով, որ երբ տեղեկացել է, որ նշանակումն եղել է, ասել է վարչապետին. «Դուք նշանակել եք ամենից անպատրաստ մեկին»: Ըստ Հակոբյանի, «հենց այդ օրվանից էլ սկսվել է բանակի քանդման գործընթացը»: Թեև մինչ այդ նշանակումը ինքը առաջարկել էր նշանակել այդ պաշտոնում Օնիկ Գասպարյանին, նաև նշելով, որ եթե այդ նշանակումը լինի, ապա ինքը պատրաստ է կանգնել իր կողքին ու աջակցել: Ինչպես հայտնի է, Օնիկ Գասպարյանը ներկայումս Գլխավոր շտաբի պետի պաշտոնն է զբաղեցնում և նշանակվել է Արտակ Դավթյանից հետո:
Հակոբյանի խոսքով, այն հատվածներում, որտեղ կանոնավոր զինված ուժերն են եղել, նահանջներ կամ չեն եղել, կամ քիչ են եղել: Այնպես որ, նշեց նա, սխալվում են քաղաքական որոշ գործիչներ, ովքեր կարծում են, թե բանակում գիտելիքը այնքան կարևոր չէ և կարելի է, օրինակ, 20 հոգով ջոկատ կազմել, գնալ ու հաղթել.
«Բանակը հաղթելու արվեստ է սովորեցնում՝ ոչ թե սնվելու, լավ ապրելու: Բանակի կռվելու ձևը կոչվում է արվեստ, կռվելը արվեստ է»,- շեշտեց նա:
Նրա խոսքով՝ պարտվեցինք և հարկ է երևույթները կոչել իրենց անուններով: Բայց և պարտությունը նոր հաղթանակ կերտելու հնարավորություն է տալիս:
Մովսես Հակոբյանը տեղեկացրեց, որ իր զորացրման մասին որոշումը դեռ հոկտեմբերի 5-ին է կայացրել, սակայն հաշվի առնելով, որ պատերազմի ընթացքում այն վնաս էր հասցնելու ԶՈՒ-ին, որոշել է սպասել մինչև պատերազմի ավարտը: Բայց Նիկոլ Փաշինյանի՝ կռվող տղաներին հրապարակ վերադառնալու և «պատերի տակ վնգստացողների» դեմ օպերացիայի կոչից հետո զեկուցագիր է գրել. «Նախարարին խնդրել եմ, որպեսզի հրամանն արձակի այնպես, ինչպես գրված է իմ զեկուցագրում, իմ զեկուցագրում գրված է ճշմարտությունը, իմ զորացման պատճառը: Բայց ՊՆ հրամանը չի համախատասխանում իմ զեկուցագրի էությանը», - հավելեց Հակոբյանը:
