Հայաստանում երկու ամսական երեխա է կորոնավիրուսով վարակվել, նաև նրա մայրը

Հայաստանում երկու ամսական երեխա է կորոնավիրուսով վարակվել մոր հետ: Այս մասին Facebook-ի ուղիղ եթերի ժամանակ ասաց ՀՀ առողջապահության նախարար Արսեն Թորոսյանը՝ հաստատելով մամուլում առկա լուրերը:

Նրա խոսքով, երեխայի մոտ սիմպտոմներ չկան, մայրիկը երկու օր ջերմել է, բայց այս պահին նա ևս սիմպտոմներ չունի, նրանք գտնվում են հիվանդանոցում.

«Ամեն ինչ արվում է նրանց հարմարավետությունը հնարավորինս ապահովելու և առողջությունը վերականգնելու համար, թեպետ որպես այդպիսին վերականգելու կարիք չկա։ Հուսով եմ՝ նրանք էլ ժամանակը լրանալուն պես բացասական թեստով դուրս կգրվեն հիվանդանոցից», - ասաց Թորոսյանը։

VERELQ-ը հիշեցնում է, որ մարտի 27-ի դրությամբ Հայաստանում կորոնավիրուսով վարակման 329 դեպք է հաստատվել, ապաքինվել է 28 քաղաքացի, ունենք մահվան մեկ դեպք: Փաստացի այսօրվա դրությամբ ունենք բուժման մեջ գտնվող 300 քաղաքացի: