ՀՀ-ից տեղի է ունեցել դիմակների արտահանում, որն արել են ոչ խոշոր վաճառողները. ՏՄՊՊՀ

61

Տնտեսական մրցակցության պաշտպանության պետական հանձնաժողովի նախագահ Գեղամ Գեւորգյանն այսօր՝ մարտի 2-ին հայտնել է, որ որոշ ժամանակ առաջ ՀՀ-ից տեղի է ունեցել դիմակների արտահանում, որը եղել է ոչ խոշոր վաճառողների կողմից:


Նրա խոսքով, մարտի 1-ին դիտանցում են իրականացրել մոտ 90 դեղատներում՝ չհաշված ցանցերը, որոնք մի քանի դեղատներ ունեն: Գևորգյանը հավաստիացնում է, որ խոշոր դեղատնային ցանցերը կամ ներմուծողները դիմակ չեն արտահանել:


«Որեւէ խոշոր ներմուծողի մոտ դիմակի գին չի բարձրացվել: Այսօր, այո, կան ցանցեր, որտեղ դիմակ գոյություն չունի, բայց գին չի բարձրացվել: Այն տեղեկատվությունը, որ ստեղծվում է արհեստական դեֆիցիտ, կամ կա գների չհիմնավորված բարձրացում,. Իրականությանը չի համապատասխանում», - ասել է նա:


Փոքր դեղատներում, նրա խոսքով, կա դիմակի գների բարձրացում՝ 200-300 դրամ, նույնիսկ ասում էին, որ List.am-ում են վաճառում, բայց դրանք հիմնականում տնտեսվարող սուբյեկտներ չեն: «Դրանք մեր տիրույթում չեն գտնվում: Հիմնական ծավալ ապահովող ընկերությունները գնային փոփոխություններ չեն արել»,-հայտարարեց Գեւորգյանը:


Նա նշեց, որ այս պահին աշխատանքներ ենք տանում, որպեսզի նաեւ փորձեն դրսի արտադրողներին կապել հայաստանյան ներմուծողների հետ, որ կարողանան դիմակի նոր խմբաքանակներ բերել Հայաստան. «Սակայն, քանի որ դրսում կա դիմակների դեֆիցիտ, դրանց գները բարձրացել են: Սա նշանակում է, որ եթե կարողանան մեր ընկերությունները դրսից թանկ գնով դիմակներ ձեռք բերել, այստեղ էլ գինը լինելու է թանկ»:


ՏՄՊՊՀ նախագահը կոչ արեց փոքր դեղատներին դրսեւորել սոցիալական պատասխանատվություն եւ խուսափել անհարկի գների բարձրացումից. «Առողջապահության նախարարությունն ունի պահեստավորած դիմակներ սեփական կարիքների համար եւ որոշ խմբաքանակ ձեռք է բերել»,-ասաց նա:


 

Տպել

Թեմայի այլ նորություններ
Загрузка...