Եվրամիության «Արևելյան գործընկերություն» նախաձեռնության նպատակը Ռուսաստանից հարևան երկրներին կտրելն է: Այս մասին հայտարարել է ՌԴ ԱԳ նախարար Սերգեյ Լավրովը:
Արևելյան գործընկերությունը նպատակ ունի կյանքի կոչել ԵՄ-ի և 6 հետխորհրդային երկրների քաղաքական և տնտեսական ինտեգրացիան: Այդ երկրներն են՝ Ադրբեջանը, Հայաստանը, Բելառուսը, Վրաստանը, Մոլդովան և Ուկրաինան:
Լավրովը կոշտ մեսիջ է հղում Արևմուտքին, որը սանիտարական կորդոն կամ բուֆերային գոտի է ստեղծում ՌԴ-ի սահմանների երկայնքով և ցանկանում է սահմանափակել Մոսկվայի քաղաքական, տնտեսական, հումանիտար ազդեցությունը նախկին ԽՍՀՄ տարածքում:
Լավրովն Արևելյան գործընկերությունը դիտարկում է ավելի շատ որպես գեոպոլիտիկ նախագիծ՝ ՌԴ-ն զսպելու ռազմավարություն, քան տնտեսական կամ այլ տիպի ինտեգրացիոն պլատֆորմ:
Եթե դիտարկենք, թե որ երկրներն են անդամակցում Արևելյան գործընկերությանը, ապա պարզ է դառնում, որ դրանց հիմնական մասը ՌԴ-ին սահմանակից երկրներն են կամ Հայաստանի ու Բելառուսի պարագայում Մոսկվայի ռազմավարական դաշնակիցները, այդ թվում՝ ՀԱՊԿ, ԵԱՏՄ անդամ:
Մոսկվան այս նախագիծն ընկալում է, որպես Արևմուտքի փորձ դուրս բերել այդ երկրները ՌԴ-ի ազդեցության գոտուց ու դրանք վերածել հակառուսական պլացդարմների: Ուկրաինայում և Վրաստանում ժամանակին տեղի ունեցած գունավոր հեղափոխությունների հետևանքով այդ երկրները 180 աստիճանով շրջվեցին դեպի ԵՄ, ԱՄՆ, ՆԱՏՕ և այս պահին նրանք ունեն լարված հարաբերություններ Մոսկվայի հետ, իսկ Վրաստանի պարագայում՝ խզված դիվանագիտական հարաբերություններ ՌԴ-ի հետ:
Արևելյան գործընկերությունը կարելի է համարել ՎՈւԱՄ (Վրաստան, Ուկրաինա, Ադրբեջան, Մոլդովա) կազմակերպության կամ պլատֆորմի տրամաբանական շարունակություն, որը հակառուսական էներգետիկ-տրանսպորտային նախագծերի կյանքի կոչման լավագույն հարթակն է:
Ինչ վերաբերվում է ՀՀ-ին ու Բելառուսին, ապա այդ երկրները Մոսկվայի ռազմավարական դաշնակիցներ են՝ ՀԱՊԿ-ի, ԵԱՏՄ-ի անդամ, իսկ ՀՀ-ում նաև տեղակայված է ռուսական ռազմաբազան և ռուսական զորքերն են ապահովում հայ-թուրքական և հայ-իրանական սահմանների անվտանգությունը: Լավրովի մեսիջը պետք է լրջագույնս ընկալվի Երևանում, քանի որ Արևմուտք-ՌԴ սառը պատերազմի պարագայում կրկին անգամ հետխորհրդային տարածքում նոր բաժանարար գծեր են ձևավորվելու ու այդ տարածքում կվերսկսվի proxy war-ը՝ այդ տարածքների նկատմամբ վերահսկողության համար:
Հետխորհրդային տարածքը այն կարմիր գիծն է, որից այն կողմ Մոսկվան չի զիջելու. դա պետք է հաշվի առնեն թե՛ Արևմուտքում, թե՛ Մոսկվայի ռազմավարական դաշնակիցները՝ Արևելյան գործընկերության մաս կազմող:
