Երվանդ Մանարյանին եւ Միխայիլ Պիոտրովսկուն Երեւանի պատվավոր քաղաքացու կոչում շնորհվեց

Երեւանի ավագանու այսօրվա նիստում որոշվեց Երեւան քաղաքի 2801-րդ տարեդարձի առթիվ մայրաքաղաքի պատվավոր քաղաքացու կոչում շնորհել ՀՀ ժողովրդական արտիստ, ՀՀ արվեստի վաստակավոր գործիչ Երվանդ Մանարյանին եւ Սանկտ-Պետերբուրգի պետական Էրմիտաժ թանգարանի գլխավոր տնօրեն, ակադեմիկոս Միխայիլ Պիոտրովսկուն:


Ավելի վաղ հայտնել էինք, որ համապատասխան որոշումների նախագծերն ընդգրկված են Երեւանի ավագանու հոկտեմբերի 8-ին կայանալիք նիստի օրակարգում:


Երվանդ Մանարյանին կոչում շնորհելու հիմնավորման մեջ նշված է՝ թատերարվեստի եւ հայկական կինեմատոգրաֆիայի զարգացման գործում ներդրած նշանակալի ավանդը, ակնառու վաստակը, երկարամյա եւ բեղմնավոր գործունեությունը: Երվանդ Մանարյանն աշխատել է Երեւանի փաստագրական ֆիլմերի ստուդիայում եւ «Երեւան» կինոմիավորումում։ Եղել է Երեւանի պետական տիկնիկային թատրոնի գլխավոր ռեժիսորը։ Նկարահանվել է վավերագրական եւ գեղարվեստական մի շարք ֆիլմերում, ինչպես՝ «Հայկական մանրանկարչություն», «Միքայել Նալբանդյան», «Կառամատույցի կրպակը», «Լույս», «Դեղերի ծնունդը», «Նորից եկավ ամառը» եւ այլն։


Անվանի դերասան, սցենարիստ եւ ռեժիսոր Երվանդ Մանարյանը գրել է բազմաթիվ սցենարներ՝ «Տժվժիկ», «Տերն ու ծառան», «Սպիտակ ափեր» եւ այլն: Նաեւ հրապարակել մի շարք պատմվածքներ ու հոդվածներ: 2005 թվականին Երվանդ Մանարյանին շնորհվել է ՀՀ արվեստի վաստակավոր գործչի կոչում, 2018 թվականին արժանացել է ՀՀ ժողովրդական արտիստի կոչման:


Ինչ վերաբերում է որոշման մյուս նախագծին, դրանում նշվում է՝ հիմք ընդունելով Երեւանի քաղաքապետի առաջարկությունը եւ հաշվի առնելով Միխայիլ Պիոտրովսկու սերտ կապերը Հայաստանի հետ, բարձր գնահատելով նրա ավանդը գիտության մեջ՝ կշնորհվի Երեւանի պատվավոր քաղաքացու կոչում: ՀՀ գիտությունների ազգային ակադեմիան Միխայիլ Պիոտրովսկուն 2008 թվականին ընտրել է ԳԱԱ արտասահմանյան անդամ: Միխայիլ Պիոտրովսկին համագործակցում է ՀՀ ԳԱԱ Փորձաքննությունների ազգային բյուրոյի հետ բարելավման ու կատարելագործման, մշակութաբանական եւ նյութագիտական փորձաքննությունների բնագավառում, նաեւ իրականացնում փորձի փոխանակում: Ավելի քան 250 աշխատությունների հեղինակ է:

Տպել

Թեմայի այլ նորություններ
Загрузка...