Երևանը պարզում է՝ արդյո՞ք Ֆրանսիայում վթարված A320 ինքնաթիռում եղել են ՀՀ քաղաքցիներ

Ֆրանսիայում Հայաստանի դեսպանատունը ներկայումս պարզում է` արդյո՞ք Ֆրանսիայի հարավում վթարի ենթարկված «German wings» ավիաընկերությանը պատկանող A320 ինքնաթիռում Հայաստանի քաղաքացիներ կամ ազգությամբ հայեր եղել են:

Այս մասին Tert.am-ին հայտնել է ԱԳՆ խոսնակ Տիգրան Բալայանը: Դեռ, ըստ նրա, ոչ մի բան պարզ չէ:

Հիշեցնենք, որ Բարսելոնայից Դյուսելդորֆ չվերթ իրականացնող ինքնաթիռը վթարվել է Ֆրանսիայի հարավում, և ըստ նախնական տեղեկությունների՝ ինքնաթիռում եղել է 148 ուղևոր և անձնակազմի 6 անդամ:

Ֆրանսիայի նախագահ Ֆրանսուա Օլանդը հայտնել էր, որ, ամենայն հավանականությամբ, ինքնաթիռի բոլոր ուղևորները զոհվել են: Օլանդը նաև զորակցություն է հայտնել ինքնաթիռի վթարի զոհերի ընտանիքներին: