Վրաստանը եւ Իրանը պայմանավորվել են զարգացնել ցամաքային բեռնափոխադրումները

Վրաստանը և Իրանը պայմանավորվել են Պարսից ծոց - Հյուսիսային տրանսպորտային միջանցքի համատեղ զարգացման շուրջ:

Վրաստանի էկոնոմիկայի նախարարությունը հայտնում է, որ այս հարցը Թբիլիսիում կայացած Միջազգային ավտոմոբիլային բեռնափեխադրումների համատեղ վրաց-իրանական հանձնաժողովի նիստի հիմնական օրակարգային հարցերից էր, որին իրանական կողմից ներկա էր Իրանի Իսլամական Հանրապետության տրանսպորտի նախարարի տեղակալ Ադոլհաշեմ Հասան Նիան։

Հանդիպման արդյունքում կազմվեց արձանագրություն, որում արտացոլվեցին երկու երկրների միջև համագործակցության գերակա ուղղությունները ցամաքային տրանսպորտի ոլորտում: Արձանագրությունը վրացական կողմից ստորագրեց էկոնոմիկայի և կայուն զարգացման նախարարի տեղակալ Ակակի Սագիրաշվիլին:

Երկու կողմերը պայմանավորվեցին համագործակցել նշված տրանսպորտային միջանցքի զարգացման հարցում և այս ուղղությամբ մշակել գործողությունների ծրագիր:

Մյուս հարցը, որի շուրջ կողմերը պայմանավորվեցին, վերաբերվում է երկու երկրների միջև 2019-2020թթ. համար բեռնափոխադրումների քվոտաներին:

Հանդիպմանը նաև ընդգծվեց, որ Վրաստանը մտադիր է ստորագրել ազատ առևտրի մասին համաձայնագիր Հնդկաստանի հետ և այս առումով կարևոր է Վրաստանի և Իրանի միջև ցամաքային բեռնափոխադրումների համակարգի պատշաճ աշխատանքը: