VERELQ-ը ներկայացնում է հայաստանյան տպագիր մամուլի տեսությունը, որում ներառված է կարևոր իրադարձությունների մասին ընդգրկուն տեղեկատվություն:
«Հրապարակ» օրաթերթը գրում է. «Իշխանական նեղ միջավայրում 1 ամիս առաջ կարծիք է հնչել, որ հանրաքվեից հետո կարող է փոխվել ԲՀԿ առաջնորդը` առաջիկա ԱԺ ընտրություններին նորացված ԲՀԿ-ով գնալու համար, եւ տրվել են որոշ անուններ, այդ թվում՝ Գագիկ Ծառուկյանի։ «Դա էր պատճառը, որ անվտանգության խորհրդից, քաղաքականությունից նրան հանեցին, սակայն պատգամավորի մանդատը թողեցին. վերադարձած Ծառուկյանն ու նորացված ԲՀԿ-ն այլեւս որեւէ կապ չեն ունենա Քոչարյանի հետ եւ կլինեն սրսուռ սերժսարգսյանական»»:
«Հրապարակ» օրաթերթը գրում է. «Գյումրիում սահմանադրական փոփոխությունների հանրաքվեից առաջ, մեր տեղեկություններով, լուրջ ռազբորկաներ են գնացել նախկին քաղաքապետ
Վարդան Ղուկասյանի եւ նախկին ԲՀԿ-ական, քաղաքապետի հավակնություններ ունեցող
Մարտուն Գրիգորյանի թիմակիցների միջեւ: Ղուկասյանը ցանկացել է իշխանությունների համար հույժ կարեւոր այս գործընթացի «քավոր» կանգնել, բնականաբար, ծանրակշիռ ակնկալիքներով: Սակայն Մարտուն Գրիգորյանի թիմը բացատրական աշխատանք է տարել, իսկ ՀՀԿ-ից նկատողություններ են ստացվել, եւ Ղուկասյանը բավարարվել է իր հարազատ Սլաբոդկա թաղամասի 2 ընտրատարածքներով, որոնք մտնում են Մարտուն Գրիգորյանի ընտրատարածքի մեջ: Մեր տեղեկություններով, երկու թիմակիցներն անցած շաբաթ հենց Սլաբոդկա թաղամասում են «հաշիվները» մաքրել։ Վարդան Ղուկասյանին ասել են, որ, իբրեւ բարի կամքի դրսեւորում, երկու ընտրատարածք կտան՝ թող զբաղվի, իսկ ավելորդ ցանկությունների դեպքում գլխացավանքների մեջ կհայտնվի: Այս ամենը հասել է ՀՀԿ կենտրոնական շտաբ, որտեղից էլ կարգի են հրավիրել Ղուկասյանին: Նա չցանկացավ զրուցել մեզ հետ, իսկ Մարտուն Գրիգորյանն էլ վստահեցրեց, թե որեւէ ընդհարում չի եղել, սակայն հաստատեց, որ Վարդան Ղուկասյանն իր ընտրատարածքի երկու տեղամասերում է աշխատանք տանելու: Պատգամավորի ընտրատարածքն ընդգրկող 41 ընտրատեղամասերից մի երկուսն էլ վստահվել են մեկ այլ գյումրեցու՝ ՀՀԿ-ական պատգամավոր Սուքիաս Ավետիսյանին, իսկ Սամվել Բալասանյանին ընդհանրապես դուրս են թողել խաղից»:
«Ժողովուրդ» օրաթերթը գրում է. ««Ժողովուրդ»-ի տեղեկություններով՝ օրերս ՀՀԿ-ում քննարկել են հարցը, թե ինչպես պետք է հանրությանը ներկայացնեն սահմանադրական փոփոխությունների նախագիծը, այլ կերպ ասած՝ որոնք են այդ փաստաթղթի առավելությունները, որ պետք է իրենք քարոզեն: Մասնավորապես, ՀՀԿ-ականներին մտահոգել է այն փաստը, որ իրենք այժմ պետք է բոլորին համոզեն, որ խորհրդարանական կառավարումն ավելի ժողովրդավարական, ավելի լավ կառավարման համակարգ է: Սա այն դեպքում, երբ ընդամենը երեք տարի՝ 2012 թվականի ԱԺ ընտրություններից առաջ, ընդդիմությունը պահանջում էր անցում կատարել խորհրդարանական կառավարման համակարգին, ՀՀԿ-ականները պնդում էին, որ այդ մոտեցումը պակաս ժողովրդավարական է, քան Հայաստանի ներկայիս կիսանախագահական կառավարման համակարգը: Երկար-բարակ քննարկելուց հետո ՀՀԿ-ականները հանգել են եզրակացության, որ սահմանադրական փոփոխությունները պետք է «գովեն»՝ խուսափելով գործող Սահմանադրության վերաբերյալ բացասական արտահայտվելուց, որպեսզի գոնե իրենք իրենց չհակասեն»:
«Հայկական ժամանակ» օրաթերթը գրում է. Սահմանադրական փոփոխությունների դեմ ձեւավորված «ոչ»-ի ճակատները միեւնույն օրը միեւնույն տեղում հավաք անցկացնելու մասին առանձին իրազեկումներ են ներկայացրել Երեւանի քաղաքապետարան, որոնք ի գիտություն են ընդունվել։ Իրազեկման դիմում ներկայացրած ՀԱԿ գործադիր քարտուղար Սամվել Աբրահամյանը մեկնաբանելով ստեղծված վիճակը, նշեց, որ «ամեն մեկը իր համար իրազեկում է ներկայացրել»։ «Մենք զուգահեռաբար տարել ու իրազեկման հայտեր ենք ներկայացրել իրենցից անկախ»,- ասաց Աբրահամյանը։ Հարցին, թե երկու իրազեկումներ ներկայացնելը չի՞ նշանակում արդյոք, որ երկու «ոչ»-երը առանձին են գործում, ՀԱԿ ներկայացուցիչը պատասխանեց. «Բացարձակապես, ինչո՞ւ պիտի այդպես դիտարկվի։ Իրազեկումներ ներկայացնելը տեխնիկական խնդիր է ու համաձայնեցնելու, փոխհամաձայնեցնելու ի՞նչ անհրաժեշտություն կա։ Նման բաներ պատմության մեջ շատ են եղել»։
