Քաղաքական մեծամասնության պատգամավորը Իրանը որակեց որպես ավտորիտար պետություն

ԱԺ «Իմ քայլը» խմբակցության պատգամավոր Հայկ Կոնջորյանը Իրանի Իսլամական Հանրապետությունը համարում է ավտորիտար։ Այս մասին պատգամավորը հայտարարեց ԱԺ նիստում:

«Եթե դիտարկենք մեր աշխարհաքաղաքական դիրքավորումը, ապա դա կարող է շատ լավ աշխատել: Մենք շրջապատված ենք ավտորիտար Թուրքիայով, ավտորիտար բնույթի Իրանով, ավտորիտար Ադրբեջանով, և մեր անմիջական հարևան Վրաստանն է միայն, որ ժողովրդավարական ճանապարհով է գնում», - հայտարարեց Կոնջորյանը։

Եվ այս շուրջ 160 միլիոնանոց ավտորիտար երկրներով շրջապատված Հայաստանը, շարունակեց նա, եթե ժողովրդավարության առաջանցիկ զարգացումը դարձնում է իր հաղթաթուղթը, կարողանում է նաև միջազգային հանրության կողմից ընկալվել որպես տարածաշրջանի առաջատար ժողովրդավարական երկիր, որը ևս անպայման ունենալու է իր դրսևորումները դիվանագիտության մեջ.

«Հայաստանում տեղի ունեցած վճռական փոփոխությունները պետք է արտացոլվեն նաև արտաքին քաղաքականության մեջ»,- շեշտեց նա:

Անդրադառնալով արցախյան հակամարտությանը, նա նշեց. «Կա ցավալի փաստ, որ մի շարք միջազգային կառույցներ, մասնավորապես, Արևմուտքում, ՀՀ-ն և Ադրբեջանը դիտարկել են նույն հարթության մեջ և տարբեր ինտեգրացիոն պրոցեսների ժամանակ դիտարկել են միասին, մեկին չնեղացնելու համար ներգրավել մյուսին և համեմատություններ են կատարվել։ Այժմ Հայաստանում փոփոխություն է կատարվել, և պետք է ժողովրդավարությունը դառնա նաև արտաքին քաղաքական, դիվանագիտության հարթակում կարևոր հաղթաթուղթը, կռվանը»։