28.03.2024
Մամուլ. Սերժ Սարգսյանի «վերջը» եկե՞լ է. ՀՀԿ-ն համագումար կհրավիրի
prev Նախորդ նորություն

Նորություններ գործընկերներից

Շատ փող, շատ անելիք. Փաշինյանը ներկայացրեց աղետի գոտու խնդիրների լուծման բանաձևը

ՀՀ կառավարությունն այսօր արտագնա նիստ է անցկացնում է Գյումրիում: Այն մեկնարկել է մեկ րոպե լռությամբ ի հիշատակ 1988 թվականի դեկտեմբեի 7-ի ավերիչ երկրաշարժի հազարավոր զոհերի:

Իր խոսքում վարչապետի պաշտոնակատար Նիկոլ Փաշինյանը հայտարարեց, որ այսօր ամենամեծ խնդիրն այն է, որ չկա գնահատական, թե ինչ ասել է աղետի գոտի ու ինչ ծավալի մասին է խոսքը։ Նա հանձնարարեց ստեղծել աշխատանքային խումբ, որը կձևավորի ամբողջական տեղեկատվական փաթեթ: Սակայն Փաշինյանի դիտարկումը, թե ծանոթ չեն իրավիճակին, հակադարձվեց ՀՀ քաղաքաշինության պետական կոմիտեի նախագահ Ավետիք Էլոյանի կողմից, որը պնդեց՝ իրավիճակին ծանոթ են: 


«Այդ դեպքում՝ ինչքա՞ն գումար է անհրաժեշտ պրոբլեմը լուծելու համար»,- իր հերթին հետաքրքրվեց վարչապետի պաշտոնակատարը: Էլոյանի պատասխանը լակոնիկ էր՝ շատ:

Փաշինյանն ասաց, որ հասկանալի է, որ շատ մեծ գործ կա անելու ու դրա համար շատ մեծ գումար է անհրաժեշտ.

«Պարոն Ջավադյան, կարո՞ղ եք շատ գումար տալ կամ Ֆինանսների նախարարությունը կարո՞ղ է շատ գումար տալ», - դիմելով ԿԲ նախագահին հետաքրքրվեց նա: Այնուհետ, վերադառնալով աշխատանքային խումբ ստեղծելու հրամայականին, կրկնեց այն և հայտարարեց՝ պետք է ձևավորվի փաթեթ և ճանապարհային քարտեզ, թե որքան գումար է հարկավոր և ինչ պետք է արվի:

Էլոյանը իր հերթին տեղեկացրեց, որ աղետի գոտու բնակավայրերում երկրաշարժի հետևանքով անօթևան մնացած ընտանիքների բնակարանային խնդիրների լուծման նպատակով պետական աջակցությամբ իրականացվող բնակապահովման ծրագրի շրջանակներում Շիրակի, Լոռու և Արագածոտնի մարզերի բնակավայրերում շահառու է ճանաչվել 5381 ընտանիք, որոնցից 4839 ընտանիքի (շահառուների 90%) բնակարանային խնդիրը լուծվել է 2008-2017 թվականներին՝ մոտ 65 մլրդ. դրամ միջոցների հաշվին:

Տեղեկացրեց նաև, որ ՀՀ կառավարության 2018-2022 թվականների գործունեության ծրագրով նախատեսված է մինչև 2020 թվականի տարեվերջ ավարտին հասցնել մնացած թվով 542 ընտանիքի նկատմամբ ձևավորված պետական պարտավորությունների կատարումը:

«Դեռևս լուծման կարիք կունենա 498 ընտանիքի բնակարանային խնդիր, որի համար կպահանջվի մոտ 3.5 մլրդ դրամ։ 2019 թվականի պետբյուջեով արդեն իսկ նախատեսված է 560 մլն դրամ», - հայտարարեց Էլոյանը։

ՀՀ տարածքային կառավարման ու զարգացման նախարարի պաշտոնակատար Սուրեն Պապիկյանն էլ նշեց, թե որքան գումար է հատկացվել աղետի գոտուն ընթացիկ տարում և որքան կհատկացվի 2019-ին: Ըստ այդ հաշվետվության, 2018-ին առաջնահերթ լուծում պահանջող խնդիրների լուծման համար Շիրակի և Լոռու մարզերին հատկացվել է 774 մլն 425 հազար դրամ՝ շուրջ 45 բնակավայրում 54 ծրագիր իրականացնելու համար:

Նա նաև նշեց, որ Վերակառուցման և զարգացման եվրոպական բանկի աջակցությամբ իրականացվող «Գյումրու քաղաքային ճանապարհներ» տեխնիկական համագործակցության դրամաշնորհային ծրագրի շրջանակներում հատկացվել է շուրջ 1,082,100.0 հազ. դրամ: Իսկ ԵՄ-ի հետ համագործակցության արդյունքում ՀՀ Շիրակի և Լոռու մարզերում իրականացվում են տարածաշրջանային զարգացման պիլոտային ծրագրեր։


 

Գյումրի, ես քեզ գիտեմ ու սիրում եմ. բաց նամակ Գյումրիին՝ ՀՀ նախագահ Արմեն Սարգսյանից
Հաջորդ նորություն next
 Ադրբեջանական լրատվամիջոցներում Հայաստանի հասցեին հնչող սպառնալիքներն անընդունելի են. Կլաար
25.03.2024
Ադրբեջանական լրատվամիջոցներում Հայաստանի հասցեին հնչող սպառնալիքներն անընդունելի են. Կլաար