Ստեղծել եք ֆեյք համակարգ, որը չի կարող զարգացման ճանապարհ ունենալ. Մարուքյանը` Սարգսյանին
Մենք ապրում ենք խայտառակ աբսուրների իրավիճակում և դրանք այնքան շատ են, որ անհնար է դրանց մասին այս ամբիոնից թվարկել: Ամեն օր նոր պրոբլեմներ են առաջացել, բայց ոչ մի լավ բան չեք արել, բարեփոխումներն էլ, որ հայտարարում եք, ռեգրես են: Այս մասին ԱԺ-ում հայտարարեց «Ելք» խմբակցության անդամ Էդմոն Մարուքյանը` վարչապետի պաշտոնում Սերժ Սարգսյանի թեկնածությունը հաստատելու քննարկման ժամանակ:
«Ստեղծել եք մի ֆեյք համակարգ, որը չի կարող զարգացման ճանապարհ ունենալ: Մեզ լուծումներ են պետք, անշրջելի իրողություններ, այլապես ոչինչ չի փոխվի: Երկիրը ռեգրես է ապրում»,-հայտարարեց նա:
«Մենք եկել ենք առաջին անգամ օգտվել հնարավորությունից ձեզ ասելու՝ ինչ է երկրում կատարվում, և ասում ենք՝ կա ձեր աշխարհը և մերը, որտեղ ապրում ենք ու գիտենք` ինչ է կատարվում»,- ասաց նա:
Ըստ պատգամավորի, Սարգսյանը շրջապատել է իրեն մարդկանցով, որոնք իրեն չեն ասում, ինչ է կատարվում երկրում, կամ, հակառակ դեպքում, ասում են՝ սակայն Սարգսյանը չի ուզում լուծել խնդիրները։
«Վերջին անգամ «Հայլուր» հաղորդումը ե՞րբ եք նայել, ձեզ հաղորդումը դուր գալի՞ս է։ Առողջապահության նախարարը ամեն օր մտածում է՝ ոնց անի, որ մարդկանց անհարմար լինի, ձեզ զեկուցու՞մ է այդ մասին։ Տրանսպորտի նախարարը կարծում է, որ թիվ 1 խնդիրը աջ ղեկով մեքենաներն են ու պիտի դրանով զնբաղվի։ Որտեղի՞ց եք գտնում այդ մարդկանց», - ասաց Մարուքյանը Սարգսյանին։
«Մենք շատ վատ վիճակում ենք և ես սթափության կոչ եմ անում: Այս պահին երկիրը հանդարտ վիճակում չէ և դա բոլորիս խնդիրն է և բոլորովս պետք է գտնենք հանգուցալուծում: Չի կարելի այս շենքում կազմակերպել հաջորդ լսումները զոհերի ու վիրավորների մասին. Չպետք է այդպես լինի: Իսկ դրա պատասխանատուն դուք եք` Սերժ Ազատի Սարգսյանը»,- նշեց նա:
Էդմոն Մարուքյանի խոսքով, բոլորը գիտեն, որ Սարգսյանը ոչինչ չի փոխելու։ «Միակ տուժող մարդը էս փոփոխություններից մեր հարգելի Գալուս Գրիգորիչն է, ուրիշ փոփոխություն մենք չենք տեսել․․․Մարդիկ վստահ են, որ դուք Էդվարդ Նալբանդյանին, որը տապալել է արտաքին քաղաքականությունը, նշանակելու եք ԱԳ նախարար, նշանակելու եք նույն առողջապահության ու տրանսպորտի նախարարին», - հավելել է նա:
Ըստ Մարուքյանի, իշխանությունները խոսում են խոսքի ազատության մասին, բայց ո՞ւր է այդ ազատությունը, եթե կառավարության նիստերը փակվում են, իսկ հեռուստատեսությունը ցույց չի տալիս իրականությունը:
Նա նաև հայտարարեց, որ «Ելք»-ը դեմ է քվեարկելու Սերժ Սարգսյանի թեկնածությանը:
