VERELQ-ը ներկայացնում է հայաստանյան տպագիր մամուլի տեսությունը, որում ներառված է կարևոր իրադարձությունների մասին ընդգրկուն տեղեկատվություն:
«Ժողովուրդ» օրաթերթը գրում է. «Հայաստանի մշտական բնակչության թիվը, ըստ պաշտոնական վիճակագրության, վերջին մեկ տարում 4 հազար 300-ով նվազել է: Նկատենք, որ եթե պաշտոնապես նշվում է՝ մշտական բնակչության թիվը նվազել է, ապա նշանակում է, որ այդքան թվով մարդ հրաժարվել է ՀՀ քաղաքացիությունից: Բանն այն է, որ մշտական բնակչության թվի մեջ ներառված չեն նաև արտագնա աշխատանքի մեկնող ՀՀ քաղաքացիները: Այսինքն՝ արտագաղթի այն տարբերակը, երբ մարդիկ Հայաստանից հեռանում են, բայց քաղաքացիությունից չեն հրաժարվում, մշտական բնակչության թվաքանակում չի արտացոլվում: Իսկ ինչ վերաբերում է արտագաղթի թվերին, ապա, ըստ պաշտոնական վիճակագրության, այս տարվա առաջին կեսից Հայաստանից մեկնել և չի վերադարձել 103 հազար 994 ՀՀ քաղաքացի: Բնականաբար, մեկնած, չվերադարձածների մի մասը մինչև տարեվերջ կվերադառնա Հայաստան: Սակայն փորձը ցույց է տվել, որ արտագաղթի թիվը կազմում է նույն տարվա առաջին կեսին մեկնած և չվերադարձածների թվի մոտ կեսի չափ»:
«Հրապարակ» օրաթերթը գրում է. ««Օրինաց երկիր» կուսակցությունում սկսել են կամաց-կամաց հրաժարվել իրենց կուսակցության անունից: Մեր տեղեկություններով՝ կուսակցությունում ներքին հրահանգ կա մոռացության տալ «ՕԵԿ» բառը, այն աստիճանաբար հանել գործածությունից, քանի որ ժողովրդի շրջանում ՕԵԿ-ը վարկաբեկված է և որևէ դրական ասոցիացիա չի առաջացնում: Փոխարենը սկսել են ակտիվորեն օգտագործել և շրջանառել «Հայկական վերածնունդ» անունը: Դրա վառ վկայությունն է նաև այն, որ ՕԵԿ-ի պաշտոնական կայքում գրեթե բոլոր նյութերը «Հայկական վերածննդի» մասին են, տարածած հաղորդագրություններում անգամ «Հայկական վերածնունդ» են գրում: Նշենք, որ անվան ընտրությունն
Արթուր Բաղդասարյանինն է եղել: Նա հայտարարել է, թե «Հայկական վերածնունդին» են միացել 60-ից ավելի կազմակերպություններ, 10 կուսակցություններ, 50-ից ավելի հասարակական կազմակերպություններ: Ասում են, թե հենց այդ միավորման միջոցով է Ռուսաստանի հայերի միության նախագահ
Արա Աբրահամյանը մտնելու քաղաքականություն: Տեսնենք, թե ինչ կստացվի քավոր-սանիկական կապերով կապված Արթուր Բաղդասարյանի և Արա Աբրահամյանի ծրագրերից»:
«Հայկական ժամանակ» օրաթերթը գրում է. «Շաբաթ օրվանից ուժի մեջ է մտել ՀԾԿՀ որոշումը, ըստ որի՝ էլէներգիայի սակագինը Հայաստանում բարձրանում 16.93 դրամով: ՀՀ կառավարությունը, սակայն, ինշպես հայտնի է, սուբսիդավորելու է սակագնի այդ ավելացված մասը: Երեկ մեր թղթակիցը ՀԷՑ-ից փորձել է պարզել, թե ի՞նչ մեխանիզմով է հայ սպառողը տեղեկանալու իր սպառած էլեկտրաէներգիայի դիմաց որքա՞ն է ինքը վճարելու, որքա՞ն է սուբսիդավորելու կառավարությունը: «Այս պահին մենք աշխատում ենք ՀՀ կառավարության հետ՝ հասկանալու այն մեխանիզմը, որով բնակիչներին պետք է բացատրվի, թե ինչպես են վճարելու էլեկտրաէներգիայի վարձը»,- պատասխանել է ՀԷՑ-ի մամուլի խոսնակ
Նատալյա Սարջանյանը: Մեր թղթակցի հարցին արդյո՞ք անդորրագրի վրա նշված է լինելու ամբողջ գումարը, թե՞ միայն այն, ինչ բնակիչը պետք է վճարի Սարջանյանը պատասխանել է. «Դեռ չեմ կարող ասել, թե անդորրագրի մեջ ինչ է լինելու գրված։ Թե ինչպես է բնակիչը հասկանալու, թե որն է իր վճարելիքը՝ դա դեռ քննարկվում է»»:
