Ադրբեջանում լայնածավալ զորավարժություններ են մեկնարկել

Ադրբեջանում լայնածավալ զորավարժություններ են մեկնարկել, որոնց, ընդհանուր առմամբ, շուրջ 25 հազար զինծառայող է մասնակցում: Այդ մասին այսօր հայտարարել է Ադրբեջանի պաշտպանության նախարարությունը:

Երկրի ռազմական գերատեսչության տվյալներով՝ զորավարժություններին ներգրավված է նաև 250 միավոր զրահատեխնիկա, շուրջ 1000 միավոր հրետանի, ինչպես նաև հինգ տասնյակ ռազմական ինքնաթիռ և ուղղաթիռ:

Ավելի վաղ Ադրբեջանի պաշտպանության նախարարությունը հայտարարել էր, որ զորավարժությունների ընթացքում «բանակային ստորաբաժանումները հետ են մղելու պայմանական հակառակորդի հարձակումը և անցնելու են հակահարձակման»:

Զորավարժությունները շարունակվելու են մինչև մարտի 17-ը:

Հիշեցնենք, ավելի վաղ ՀՀ ԱԳՆ խոսնակ Տիգրան Բալայանը հայտարարել է, որ Ադրբեջանը սկսել է զորավարժություններ (երկրի նախագահի «վերընտրվելու» քարոզարշավի ամենամարդաշատ իրադարձությունը) ԵԱՀԿ-ի առջեւ ստանձնած հանձնառությունների աղաղակող խախտմամբ՝ առանց տեղեկացնելու ԵԱՀԿ-ի մասնակից պետություններին այդ մասին: