Իսրայելական Aeronautics ընկերությունը հանդես է եկել հաղորդագրությամբ, որում նշել է, որ երկրի ՊՆ-ի արտահանման վերահսկողության բաժինը ժամանակավոր արգելափակել է կարևոր գործընկերոջը 20 մլն դոլարի Orbitier K1 անօդաչու սարքերի մատակարարման գործարքը: Այս մասին հայտնում է NEWSru.com.il կայքը:
Փաստաթղթում նշվում է, որ մատակարարումները պետք է իրականացվեն 2017-2018թթ-ին: 2016 թվականին տվյալ գնորդի գնումները կազմել են ընկերության եկամուտի 20%-ը, իսկ 2015-ին՝ 18%-ը: Ընկերությունը չի հրապարակում գործընկերոջ անունը, սակայն նշում է, որ խոսքը մի պետության մասին է, որի հետ Իսրայելն ունի սերտ տնտեսական հարաբերությունները և որը Moody’s ընկերության կողմից ունի Ba վարկային ռեյտինգ. հաղորդում է Bizportal-ը:
Բացի այս, նշվում է, որ այդ երկրում տեղակայված է գործարան, որը Aeronautics-ի լիցենզիայով արտադրում է պահեստամասեր անօդաչու սարքերի համար: Աղբյուրը նշում է, որ Aeronautics-ի գնորդների շրջանում միայն Սերբիան և Ադրբեջանն ունեն Ba վարկային ռեյտինգ, բայց միայն Ադրբեջանում է, որ Aeronautics-ն գործարան ունի: Բայց հաղորդագրության մեջ հստակ հասցեագրված չէ Ադրբեջանը:
NEWSru.co.il կայքի խմբագրությունը մեկնաբանությունների համար դիմել է Իսրայելի ՊՆ-ին, սակայն հրապարակման պահին պատասխան չի ստացվել:
Աղբյուրը հիշեցնում է, որ մի քանի շաբաթ առաջ իսրայելակա "Մաարից ա-Շավուա" թերթը գրել էր, որ Իսրայելի ՊՆ-ն հետաքննում է տեղեկատվություն այն մասին, որ իսրայելական Aeronautics Defense Systems ընկերության օպերատորները հրաժարվել են Ադրբեջանին մատակարարվելիք նոր անօդաչու տեխնիկայի հնարավորությունները ցուցադրել հայկական դիրքերի վրա: Հրապարակման հեղինակ Յոսի Մելմանը պնդում էր, որ համապատասխան բողոք ներկայացվել է Իսրայելի պաշտպանության նախարարությանը, սակայն Aeronautics Defense Systems ընկերությունում մեղադրանքները հերքեցին:
Հեղինակը պնդում էր, որ միջադեպը տեղի է ունեցել , երբ Aeronautics Defense Systems ընկերության պատվիրակությունը գտնվում էր Բաքվում: Ադրբեջանցի զինվորականները խնդրել են, որպեսզի նոր տեխնիկայի հնարավորությունները ստուգվեն իրական պայմաններում՝ հայկական կողմի դեմ ռազմական գործողությունների շժամանակ: Սակայն մերժում են ստացել, քանզի Իսրայելի օրենսդրության համաձայն էլ իսրայելական զինտեխնիկայի մատակարարները իրավունք չունեն ուղղակի կամ անուղղակի կերպով մասնակցել այլ պետությունների տարածքում ռազմական գործողություններին:
Ի դեպ, հրապարակման հեղինակը նշում էր, որ ընկերության օպերատորների վրա, որոնք մերժել են ադրբեջանական կողմի խնդրանքը, փորձ է արվել ճնշում գործադրել: Հետագայում օպերատորներից մեկը ազատվել է աշխատանքից, մյուսը պատրաստվում է նույն քայլին դիմել:
Նշենք նաև, որ Aeronautics Defense Systems-ն ԱԹՍ-ներ արտադրող երրորդ խոշորագույն իսրայելական ընկերությունն է՝ Israel Aerospace Industries ու Elbit Systems ընկերությունից հետո։
