Մոլդովայի նախագահ Իգոր Դոդոնը կայցելի Հայաստան

Առաջիկա աշնանը նախատեսված է Մոլդովայի նախագահ Իգոր Դոդոնի պաշտոնական այցը Հայաստան:

ՀՀ ԱԳՆ հաղորդմամբ, այս մասին Մոլդովայում Հայաստանի դեսպան Ջիվան Մովսիսյանի հետ հանդիպման ժամանակ ասել է Մոլդովայի վարչապետ Պավել Ֆիլիպը: Այդ հանդիպման ժամանակ քննարկվել են նաև Մոլդովայի հայ համայնքին առնչվող հարցեր։

Պավել Ֆիլիպը կարևորել է նաև այս տարվա նոյեմբեր ամսին հայ-մոլդովական տնտեսական միջկառավարական հանձնաժողովի առաջին նիստի անցկացումը Երևանում` նշելով, որ այն կարևոր քայլ է առևտրա-տնտեսական կապերի ծավալման և զարգացման ուղղությամբ:

Դեսպան Մովսիսյանը ներկայացրել է տնտեսական բարեփոխումների շրջանակներում օտարերկրյա նեդրումների և հայկական ապրանքների արտահանման խթանման ուղղությամբ ՀՀ կառավարության կողմից ձեռնարկվող քայլերի մասին՝ անդրադարձ կատարելով այս տարի երկկողմ հարաբերությունների զարգացման ուղղությամբ անցկացված և նախատեսվող միջոցառումներին, որոնց թվում էին Երևանում տեղի ունեցած քաղաքական և իրավական խորհրդատվությունները, երկու երկրների միջև դիվանագիտական հարաբերությունների հաստատման 25-ամյակին նվիրված միջոցառումները:

Մոլդովայի վարչապետն անդրադարձել է նաև Մոլդովայում տնտեսական բարեփոխությունների և մասնավորապես ներդրումների համար բարենպաստ պայմաններ ստեղծելու ուղղությամբ կառավարության կողմից իրականացվող քայլերին՝ պատրաստակամություն հայտնելով աջակցելու երկկողմ հետաքրքրություն ներկայացնող ներդրումային ծրագրերին և նախաձեռնություններին:

Հանդիպման ժամանակ կողմերն ամդրադարձել են նաև տրանսպորտային հաղորդակցության հարցերին, մասնավորապես բեռնափոխադրումների իրականացման համար Ջուրջուլեշտ նավահանգստի հնարավորությունների օգտագործման և Քիշնև-Երևան-Քիշնև ավիաչվերթի իրականացման հեռանկարին: