Հայաստանը պետգնումներում նախապատվությունը տալու է ԵՏՄ արտադրանքին

Պետական գնումներ իրականացնելիս Կառավարությունն այսուհետ նախապատվությունը տալու է Եվրասիական տնտեսական միության անդամ պետություններում արտադրված ապրանքներին, եթե անգամ դրանք մինչև 15 տոկոսով թանկ լինեն այլ երկրների համանման արտադրանքից։

Այս մասին կառավարությունը որոշում է ընդունել հունվարի 30-ին կայացած նիստին՝ ուժը կորցրած ճանաչելով 2011 թվականի պետգնումների մասին նախկին որոշումը։ Բավական ծավալուն այս փաստաթղթում ավելացվեցին նոր դրույթներ՝ հիմնականում նպատակ ունենալով այն համապատասխանեցնել ԵՏՄ-ի պահանջներին։

Հայաստանում տարեկան միջինը կայանում է 17-18 հազար պետգնում, որոնց մոտ 70 տոկոսը բաժին է ընկնում մեկ անձից կատարվող գնումներին։ Կառավարության հիշյալ նիստի ժամանակ, ներկայացնելով այս փոփոխությունը, ֆինանսների փոխնախարար Վարդան Միրումյանը նշել էր, որ այն նպաստելու է վերահսկողական լծակների, կոռուպցիոն ռիսկերի նվազմանը՝ միևնույն ժամանակ չթաքցնելով, որ կլինեն նաև մի շարք սահմանափակումներ։

Փոխնախարարի այս բացատրությունը չէր բավարարել վարչապետ Հովիկ Աբրահամյանին։ «Ինչո՞ւ չեք խոսում ամենակարևոր առավելության մասին, չէ որ սրանով կառավարությունը աջակցում է հայրենական արտադրողին»,- բարկացել էր Աբրահամյանը, հայտնում է Ազատություն ռադիոկայանը: