Փաշինյանը մեկնաբանել է «Տելեկոմ Արմենիայի» և «Ազերտելեկոմի» համաձայնագիրը

Հայաստանի վարչապետը պաշտպանել է «Տելեկոմ Արմենիայի» և «Ազերտելեկոմի» միջև տարանցիկ ինտերնետի մատակարարման մասին նոր համաձայնագիրը՝ ընդգծելով, որ նման նախագծերն ամրապնդում են երկրի անվտանգությունն ու քաղաքական կշիռը տարածաշրջանում:

Հայաստանի և Ադրբեջանի հեռահաղորդակցության ոլորտի խոշոր օպերատորները կնքել են կոմերցիոն պայմանագիր, որը նախատեսում է երկու պետությունների տարածքներով ինտերնետի փոխադարձ տարանցում։ Գործարքը քննադատությունների ալիք էր բարձրացրել ընդդիմադիր շրջանակներում, ինչին ի պատասխան վարչապետ Նիկոլ Փաշինյանը կառավարության ճեպազրույցի ժամանակ հանդես է եկել պարզաբանումներով։ Կառավարության ղեկավարը հերքել է այն պնդումները, թե նախագիծը վտանգներ է պարունակում՝ նշելով, որ միջազգային տնտեսական գործընթացների տրամաբանությունն այլ է։

«Սովորաբար տրանզիտը ոչ թե տրանզիտ երկրին է կախվածություն բերում, այլ տրանզիտի վերջնական կետին է կախվածություն բերում, և սա պարզ տրամաբանություն է»,- հայտարարել է Փաշինյանը։

Վարչապետի համոզմամբ՝ միջազգային հաղորդակցության ուղիների ավելացումն ուղիղ համեմատական է պետության կայունությանը: Նա շեշտել է, որ որքան շատ ենթակառուցվածքներ են հատում երկրի տարածքը, այնքան բարձրանում է նրա տնտեսական և անվտանգային մակարդակը։ Ըստ Փաշինյանի՝ քննադատները ցանկանում են պետությունը տեսնել որպես կոնֆլիկտի փակուղի, մինչդեռ կառավարության նպատակը «Խաղաղության խաչմերուկի» կառուցումն է։

«Հարավից հյուսիս, հյուսիսից հարավ, արևելքից արևմուտք, արևմուտքից արևելք ինչքան հնարավոր է՝ պետք է մալուխներ, խողովակներ, ճանապարհներ, երկաթուղիներ, օդային գծեր անցնեն: Դա է խաղաղության և անվտանգության երաշխիքը»,- հավելել է նա:

Միաժամանակ, ոլորտի փորձագետները փարատում են տվյալների արտահոսքի վերաբերյալ մտահոգությունները։ Մասնագետների հավաստմամբ՝ ադրբեջանական ինտերնետ տրաֆիկը, համաձայն այս պահին առկա տեղեկատվության, պարզապես պետք է անցնի Հայաստանի տարածքով՝ ֆիզիկապես չմիանալով և չներթափանցելով հայկական ներքին ցանց։