ՌԴ-ն զգուշացրել է Եվրամիությանն անդամակցելու դեպքում գազի թանկացման ռիսկերի մասին
Հայաստանի հնարավոր անդամակցությունը Եվրամիությանը կարող է հանգեցնել ռուսական էներգակիրների գնի զգալի աճի՝ մաքսային արտոնությունների կորստի և լոգիստիկ երթուղիների փոփոխության պատճառով, սակայն Մոսկվան շահագրգռված չէ իրադարձությունների նման զարգացմամբ։
Ինչպես հայտնել է ՌԴ փոխվարչապետ Ալեքսեյ Օվերչուկը, Երևանը փաստացի այլընտրանք չի ունենա ռուսական կապույտ վառելիքին, և փոխգործակցության ձևաչափի փոփոխության դեպքում առանցքային խնդիր է դառնալու մատակարարման երթուղին։ Փոխվարչապետը պարզաբանել է, որ շուկայական պայմաններին անցումը, 30 տոկոսանոց արտահանման տուրքի կիրառումն ու միջնորդների հայտնվելը անխուսափելիորեն կհանգեցնեն հումքի թանկացմանը, ինչը չափազանց բարդ կացություն կստեղծի հանրապետության համար։
Այս քննարկումները ծավալվում են Երևանի աշխարհաքաղաքական կողմնորոշման համատեքստում։ Որոշ ժամանակ առաջ ՀՀ Ազգային ժողովն ընդունել է ԵՄ-ին անդամակցելու գործընթաց սկսելու մասին օրենքը, թեև վարչապետ Նիկոլ Փաշինյանը վստահեցրել է, որ ԵԱՏՄ-ից դուրս գալու հարցն այժմ օրակարգում չէ։
Այդուհանդերձ, ՌԴ ԱԳՆ-ն գրավոր զգուշացրել է հայկական կողմին 2013 թվականի համաձայնագրերի խզման ռիսկերի մասին, որոնք ապահովում են գազի, նավթամթերքի և չմշակված ալմաստի անմաքս մատակարարումները բացառապես ներքին սպառման համար։ Ռուսական կողմի տվյալներով՝ այժմ Հայաստանը գազը ստանում է արտոնյալ՝ 177,5 դոլար գնով՝ հազար խորանարդ մետրի դիմաց, մինչդեռ եվրոպական սակագինը կազմում է շուրջ 633 դոլար։
Իր հերթին, ՀՀ տարածքային կառավարման և ենթակառուցվածքների նախարարությունը հաստատել է Մոսկվայից նամակի ստացումը։ Գերատեսչության ղեկավար Դավիթ Խուդաթյանը նշել է, որ Երևանն ի գիտություն է ընդունել տեղեկատվությունը՝ հավելելով, որ էներգետիկայի ոլորտում աշխատանքային հարաբերությունները շարունակվում են բնականոն հունով։
Միևնույն ժամանակ, ՌԴ էներգետիկայի նախարարությունից հայտնել են, որ հայկական կողմից պաշտոնական պատասխան իրենց շարադրած դիրքորոշման վերաբերյալ դեռևս չեն ստացել։
Ավելի վաղ Հայաստանի վարչապետ Նիկոլ Փաշինյանը բազմիցս հայտարարել էր լոգիստիկ և աշխարհաքաղաքական երթուղիների դիվերսիֆիկացմանն ուղղված Երևանի ռազմավարական կուրսի մասին։ Կառավարության ղեկավարն ընդգծել էր, որ երկիրը ձգտում է հաղթահարել մեկուսացումը և հրաժարվել մեկ դաշնակցից, տրանսպորտային ճանապարհից կամ էներգետիկ խողովակաշարից ունեցած անալտերնատիվ կախվածությունից։
Այս հայեցակարգի շրջանակներում հայկական իշխանությունները շեշտը դնում էին բազմավեկտոր ենթակառուցվածքների զարգացման վրա։ Մասնավորապես, խոսքը վերաբերում էր Արևմուտք — Արևելք ուղղությամբ երկաթուղային հաղորդակցության ընդլայնմանը, Ախալքալաք — Կարս երթուղու օգտագործմանը, ինչպես նաև Ադրբեջանի տարածքով տրանսպորտային միջանցքների գործարկման հեռանկարներին, ինչը, հանրապետության ղեկավարության մտահղացմամբ, պետք է ապահովի Հայաստանի տնտեսական մեծ ճկունությունն ու անկախությունը։
