28.03.2024
Գիշերը շփման գծում համեմատաբար հանգիստ է անցել
prev Նախորդ նորություն

Նորություններ գործընկերներից

0,3% եկամուտների աճ. ԱԺ-ում պետբյուջեի քննարկումը սկսվեց կառավարության քննադատությամբ

Ազգային ժողովում 2017 թ.-ի բյուջեի քննարկումը սկսվեց կառավարության հասցեին սուր քննադատությամբ: Քննադատվեց կառավարությունը ոչ միայն պատգամավորներին չբավարարող բյուջեի նախագիծ ներկայացնելու համար, այլեւ այն բանի, որ գործադիրը ողջ կազմով չէր ներկայացել քննարկմանը:

«Էս տարիների ընթացքում առաջին անգամ եմ տեսնում, որ բյուջե են քննարկում և կառավարությունը այստեղ չէ: Այսպիսի բան՝ զարմանալի պատմություն է», - հայտարարեց ԱԺ հանրապետական խոսնակ Գալուստ Սահակյանը: «Հետաձգե՛ք, պարո՛ն Սահակյան», - դահլիճից միացավ մեկ այլ հանրապետական՝ Վարդան Այվազյանը: - «Պարոն Սահակյանը գիտի, ինչն է հետաձգում, երբ է հետաձգում և ինչի համար է հետաձգում», - հակադարձեց ԱԺ խոսնակը, հայտնում է Ազատություն ռադիոկայանը:

Գալուստ Սահակյանին աջակցեց նաև ընդդիմադիր Արամ Մանուկյանը․ - «Իսկապես՝ անհարգալից է, պարոնա՛յք նախարարներ: Սա թիվ մեկ փաստաթուղթն է ձեր և ամենակարևոր փաստաթուղթը, որն ընդհանրապես քննարկվում է՝ բյուջեն»: Ազգային ժողով ներկայացած միակ՝ Ֆինանսների նախարար Վարդան Արամյանը դիտողություններն ընդունեց. գործընկերները ճանապարհին են: Զեկուցեց՝ բյուջեն «պահպանողական է, կայունացման», բերած փաստաթուղթը հաջորդ տարի թոշակի և նվազագույն աշխատավարձի բարձրացում չի նախատեսում:

«2017 թվականի համար մենք կանխատեսում ենք 3.2 տոկոս իրական աճ, նպաստող կլինի արդյունաբերությունը, որը ակնկալում ենք՝ աճելու է 5.5 տոկոսով, ծառայությունները՝ 2.8 տոկոսով», - նշեց Արամյանը:

2017-ի բյուջեն շուրջ 1 տրիլիոն 360 միլիոն դրամ է կամ ավելի քան 2 միլիարդ 800 միլիոն դոլար՝ մի քանի միլիոն դրամի տարբերությամբ այս տարվա հետ: Հարկային եկամուտները, ըստ փաստաթղթի, ընդամենը 0,3 տոկոսով են ավելանալու: Այս թիվը Հայ ազգային կոնգրեսից Արամ Մանուկյանի տարակուսանքն առաջացրեց․ - «Արդյո՞ք սա չի հակասում Ձեր կառավարության այն աղմկոտ, ռեֆորմատոր մուտքին, որ գալու եք և լուրջ ռեֆորմներ անեք ստվերի, կոռուպցիայի դաշտում: Եթե մենք ունենք 40 տոկոսանոց ստվեր, ընդ որում՝ Ձեր զեկույցի մեջ մի անգամ գոնե ստվեր բառը չհնչեց, ո՛չ մենաշնորհ, ո՛չ ստվեր, ո՛չ կոռուպցիա, իսկ մենք բոլորս գիտենք, որն է մեր բյուջեի հիվանդոտ տեղերը․․․ 0.3 տոկոսը նշանակում է ուղղակի ոչինչ չանել»:

Թեման շարունակեցին «Բարգավաճ Հայաստանից» Նաիրա Զոհրաբյանն ու Միքայել Մելքումյանը: «Եթե մենք ուզում ենք լուրջ պայքար սկսել ստվերի դեմ, կոռուպցիայի դեմ, այլ ծրագրեր ենք իրականցնում բիզնեսի աջակցման համար, բնականաբար, 3.2 տոկոս աճը կրելու է ընդամենը գոյատևման բնույթ», - հայտարարեց Մելքումյանը:

Զոհրաբյանը հարց ուղղեց նախարարին․ - «Ստվերը քանի՞ տոկոս է մեր տնտեսության մեջ այս պահին պաշտոնապես: Պետք է բոլորին բերել հարկային դաշտ և մենաշնորհատերերի մենաշնորհները ձեռքի մեկ հարվածով փակել: Դա արվե՞լ է, արվո՞ւմ է, թե ոչ»:

«Պաշտոնապես ցուցանիշ ստվերի վերաբերյալ՝ եթե մենք իմանայինք դա ինչքան է, դա ստվեր չի լինի, դա կլինի ֆորմալ հատված: Գնահատականներ կան ստվերի մասին՝ մոտավորապես 30 տոկոս է գնահատվում: Ստվերի դեմ պայքարի միակ տարբերակը դա ճիշտ գործիքակազմով տնտեսավարողներին բերել նորմալ հարկային դաշտ», - պատասխանեց ֆինանսների նախարարը:

Դեֆոլտի մասին ահազանգած Լևոն Տեր-Պետրոսյանի թիմակիցը՝ Լևոն Զուրաբյանը, Վարդան Արամյանին հիշեցրեց՝ ինքը նախարարն է ասել, որ առնվազն 5 տոկոսանոց աճի դեպքում միայն հնարավոր կլինի արտաքին պարտքի փոսից դուրս գալ, ուրեմն այս 3,2 տոկոսով ի՞նչ է լինելու: - «Այս կառավարությունը ինչո՞ւ է վերցրել երկրի կառավարման ղեկը, թող զիջի մեկ այլ կառավարության, որը ունի իրատեսական ծրագիր երկիրը զարգացնելու համար», - շարունակեց Զուրաբյանը:

«Ճիշտ հակառակը՝ մենք պարտքային փոսից դուրս ենք գալիս», - կարճ պատասխանեց նախարարը:
Շարմազանով. Անկուսակցական քաղաքական գործիչների էպոպեան անցյալում է
Հաջորդ նորություն next
 Ադրբեջանական լրատվամիջոցներում Հայաստանի հասցեին հնչող սպառնալիքներն անընդունելի են. Կլաար
25.03.2024
Ադրբեջանական լրատվամիջոցներում Հայաստանի հասցեին հնչող սպառնալիքներն անընդունելի են. Կլաար