ԼՂ հակամարտության կարգավորումը ձեռնտու պետք է լինի և՛ ՀՀ-ին, և՛ Ադրբեջանին. Լուկաշենկո

Հայաստանի և Ադրբեջանի միջև հակամարտության լուծումը պետք է ձեռնտու լինի երկու կողմերին. այս մասին հունիսի 8-ին հայտարարել է Բելառուսի նախագահ Ալեքսանդր Լուկաշենկոն՝ Հավաքական անվտանգության պայմանագրի կազմակերպության անդամ երկրների անվտանգության խորհուրդների քարտուղարների հետ հանդիպմանը, հայտնում է BelTA-ն։

«Ե՛վ ադրբեջանցիները, և՛ հայերը հարազատներ են, ինչպես մի ձեռքի երկու մատներ, և ինչ ուզում եք՝ արեք դրանով»,- նշել է Ալեքսանդր Լուկաշենկոն։

Նա ասել է, որ նախորդ տարիներին ինքը մեծ ջանքեր է ներդրել կողմերի միջև հակամարտությունը լուծելու համար՝ փորձելով փոխգործակցություն հաստատել Հայաստանի և Ադրբեջանի ղեկավարների միջև։

«Հիմա ամեն ինչ ավելի է բարդացել, պետք է կարգավորել այս իրավիճակը: Այս դեպքում, իհարկե, ես սատարում եմ Նիկոլ Վովաևիչին՝ գիտակցելով, որ այս բոլոր թերություններն ընկել են իր կառավարության, նրա վրա։ Ուստի (հիմա մեզ պետք է –ԲԵԼՏԱ) համբերություն և փորձեր՝ խնդրին լուծում գտնելու համար, որպեսզի դա ձեռնտու լինի և՛ Հայաստանին, և՛ Ադրբեջանին»,- ընդգծել է պետության ղեկավարը։

Ըստ նրա՝ ՀԱՊԿ երկրների անվտանգության խորհուրդների քարտուղարները նույնպես պետք է իրենց առաջարկներն անեն, քանի որ նրանք այս իրավիճակում դրսից դիտորդներ չեն։ «Դուք մեր հիմնական օգնականներն եք պաշտպանության և անվտանգության հարցերում»,- ասել է նա։

Բելառուսը ՀԱՊԿ-ում նախագահում է 2023 թվականին, Ալեքսանդր Լուկաշենկոն ասել է, որ երկիրը կձգտի օգնել Հայաստանին և Ադրբեջանին լուծել վեճերը։ Նախագահն ընդգծել է, որ ՀԱՊԿ տարածքում հակամարտությունները, հատկապես զինված, պետք է լուծվեն։

«Մենք չենք կարող հանգիստ հետևել, երբ ՀԱՊԿ տարածքում հակամարտություններ են լինում, մենք չենք դրանցից խուսափել: Նրանք մեր եղբայրներն են. մենք ապրել ենք նույն պետությունում, ուստի դրանք պետք է լուծվեն»,- ամփոփել է երկրի ղեկավարը։