Ծրագրի շրջանակում նախատեսվում է վերակառուցել «Հյուսիս-հարավ» ավտոճանապարհային միջանցքի շուրջ 32 կմ երկարությամբ ճանապարհ (Ագարակ-նախատեսվող Քաջարանի թունելի մուտք): Այս մասին ասել է Տարածքային կառավարման եւ ենթակառուցվածքների նախարարի տեղակալ Քրիստինե Ղալեչյանը:
Խորհրդարանը մայիսի 2-ի լիագումար նիստում քննարկել է Կառավարության ներկայացրած՝ ««Հայաստանի Հանրապետության եւ Եվրասիական զարգացման բանկի միջեւ «Հյուսիս-հարավ» ավտոճանապարհային միջանցքի շինարարություն (4-րդ հերթ)» նախագծի ֆինանսավորման համար Կայունացման եւ զարգացման եվրասիական հիմնադրամի միջոցներից ներդրումային վարկի տրամադրման մասին» համաձայնագրի թիվ 4 լրացուցիչ համաձայնագիրը վավերացնելու մասին» օրենքի նախագիծը:
Փոխնախարարը հայտնել է, որ համաձայնագրի վավերացման արդյունքում երկրորդ տեխնիկական կարգի 80 կմ/ժ արագությամբ 3 երթեւեկելի գոտիներով ճանապարհ կստեղծվի: Նախատեսվում է կառուցել նաեւ 17 կամուրջ, 2 թունել:
Գերատեսչության ներկայացուցչի դիտարկմամբ նախագծով առաջարկվում է կատարել երկու փոփոխություն՝ երկարաձգել վարկային համաձայնագրի ժամկետը մինչեւ 2026 թվականի դեկտեմբերի 30-ը, եւ ծրագրի բյուջեում կատարել փոփոխություններ. շինարարական աշխատանքները ֆինանսավորելու մասով համաֆինանսավորման միջոցների չափն ավելացնել շուրջ 86.681.000 ԱՄՆ դոլարի չափով, ինչի արդյունքում ծրագրի ամփոփ բյուջեն կկազմի 236.681.000 ԱՄՆ դոլար:
Նախարարի տեղակալը վստահեցրել է, որ ճանապարհահատվածի վերանորոգումը հանգեցնելու է երթեւկության էական փոփոխությունների, կրճատելու է մի կետից մյուսը հասնելու ժամանակը 68 րոպեով:
ԱԺ նախագահի տեղակալ Հակոբ Արշակյանը նկատել է, որ ռազմավարական նշանակության ծրագիր է քննարկվում խորհրդարանում: Նա հետաքրքրվել, թե Իրան-Հայաստան սահմանից մինչեւ ո՞ր բնակավայրն է ներառում նախագիծը, եւ ի՞նչ ընթացք ունեն Բագրուշատի թունելի նախագծման աշխատանքները:
Ի պատասխան ԱԺ փոխնախագահի հարցի՝ հիմնական զեկուցողը հայտնել է, որ «Հյուսիս-հարավ» ավտոճանապարհային միջանցքի շինարարության 4-րդ հերթի նորոգվող ճանապարհահատվածն Իրան-Հայաստան սահմանից մինչեւ Քաջարանի թունելի մուտք է նախատեսված:
«Բագրուշատի թունելի ծրագիրը Կառավարության համար առաջնահերթություն է: Երեք դոնոր կազմակերպությունների ֆինանսավորման հայտեր ենք ներկայացրել: Ծրագիրն աննախադեպ է տարածաշրջանի համար: Դրա հետագա ընթացքի ու մրցութային գործընթացի իրականացման մասով դոնորների հետ քննարկումներ են ընթանում»,- նշել է ՏԿԵ փոխնախարարը:
«Հայաստան» խմբակցության պատգամավոր Գեղամ Նազարյանն էլ հետաքրքրվել է՝ ե՞րբ է նախատեսվում ավարտել Սիսիան-Ագարակ ճանապարհահատվածի նորոգման աշխատանքները, օտարերկրյա շինարարական կազմակերպությունները ՀՀ-ում շինարարական աշխատանքներին մասնակցելու հայտ ներկայացրե՞լ են: Պատգամավորի հարցերին ի պատասխան՝ փոխնախարարը տեղեկացրել է, որ Սիսիան-ՀՀ-Իրանի սահման ճանապարհահատվածի նորոգման աշխատանքները նախատեսված է իրականացնել 6 տարի ժամկետում ու հայտնել, որ միջազգային շատ կազմակերպություններ ակտիվ մասնակցում են ՀՀ-ում շինարարական աշխատանքներին մասնակցելու համար հայտարարվող մրցույթներին:
Ֆինանսավարկային եւ բյուջետային հարցերի մշտական հանձնաժողովի անդամ Նարեկ Գրիգորյանը հայտնել է, որ նախագիծը քննարկվել է հանձնաժողովում, ստացել դրական եզրակացություն: Պատգամավորը կոչ է արել կողմ քվեարկել նախագծին:
Ելույթների ընթացքում պատգամավորներն անդրադարձել են ՎԶԵԲ-ի՝ ՀՀ-ին տրամադրած 2,6 մլրդ եվրո վարկային-դրամաշնորհային ծրագրին, դրա ծախսվող ուղղություններին, «Հյուսիս-հարավ» ճանապարհի անորակ կառուցմանը:
Նախագծի վերաբերյալ իր կարծիքն է հայտնել նաեւ ԱԺ նախագահի տեղակալ Հակոբ Արշակյանը:
ԱԺ փոխնախագահն արտահերթ ելույթի ընթացքում բարձր է գնահատել ՀՀ-ԵԶԲ վարկային ծրագրի հաստատումն ու նշել, որ ծավալված քննարկման արդյունքում խորհրդարանականները մեծ տեղեկություն են ստացել «Հյուսիս-հարավ» ճանապարհահատվածի հարավային ուղղությամբ կատարվող աշխատանքների մասին:
«Միջպետական ճանապարհների միջին արագության վերաբերյալ նոր որակական փուլի ենք դուրս գալիս, որը հատուկ է միջազգային մեծ ծրագրերին: Կոչ եմ անում՝ որպես գնահատական ԱԺ-ին ներկայացնել նաեւ ծրագրային բյուջետավորման աշխատանքների մեջ մայրուղիների կոնկրետ հատվածների միջին արագությունը: Միջին արագությունն է տնտեսական ամենակարեւոր բաղադրիչներից մեկը»,- նշել է ԱԺ փոխնախագահը:
Եզրափակիչ ելույթի ընթացքում ՏԿԵ փոխնախարարը նշել է, որ նախագծի ընդունմամբ կբարձրացվի ճանապարհի անվտանգության մակարդակը, այն կդառնա միջազգային փոխադրումների իրականացման տեսանկյունից գերակա ուղղություն՝ բավարարելով միջազգային բոլոր չափանիշներին:
