ՀՀ իշխանությունները ժամանակ են ձգում, որ կատարեն Բաքվի և Անկարայի պահանջները. Մինասյան

Հայաստանի ներկայիս իշխանությունները տարբեր հնարքներ են օգտագործում՝ Արցախի համար պատասխանատվության իրենց բաժինը խուսափելու համար։ Այս մասին ԱԺ-ում ավանդական ճեպազրույցների ժամանակ ասաց «Հայաստան» խմբակցության քարտուղար Արծվիկ Մինասյանը։

Այդ հնարքների թվում Մինասյանը ներառեց իշխանությունների հայտարարությունները Բաքվի և Ստեփանակերտի միջև երկխոսության միջազգայնորեն տեսանելի մեխանիզմի մասին։ Պատգամավորն անընդունելի համարեց իշխանությունների նման մոտեցումները: Միաժամանակ, Մինասյանը համաձայն չէ այն գնահատականի հետ, որ, ի տարբերություն նախորդ գործընթացների, այս մեկը թույլ է տալիս Արցախի անմիջական մասնակցությունն իր ճակատագրի որոշմանը։

«Ինչ վերաբերում է Արցախի ներգրավմանը, ապա դա նախատեսված էր ԵԱՀԿ Մինսկի խմբի ձևաչափով։ Նրա ներգրավումը նախատեսված էր որոշակի փուլում, երբ արդեն կներկայացվեին խնդրի լուծման տարբերակներ»,- ասաց նա։

Արցախի ներգրավման մյուս մեխանիզմները, այդ թվում՝ նրանք, որոնց մասին այսօր խոսում են իշխանությունները, դատապարտված են ձախողման. «Այն պայմաններում, երբ Ադրբեջանն ի սկզբանե հայտարարում է, որ Լեռնային Ղարաբաղ անունով միավոր չկա, իսկ արցախահայությունը Ադրբեջանի ազգային փոքրամասնություն է, բացառվում է հայկական կողմի նպատակներին համապատասխան միջազգային մեխանիզմի կիրառման հնարավորությունը»,- ասաց Մինասյանը:

Պատգամավորը տեսակետ հայտնեց՝ եթե ​​երկխոսությունը հիմնված է ինքնորոշման իրավունքի վրա, ապա այս գործընթացի շուրջ հնարավոր է արդյունավետ միջազգային մեխանիզմ։ Մնացած դեպքերում այս գործընթացը վերածվում է դանդաղ մահվան։ Մինչդեռ ՀՅԴ-ական պատգամավորը բացառեց, որ Հայաստանի իշխանությունները կկարողանան հասնել այնպիսի միջազգային մեխանիզմի ստեղծմանը, որում Ստեփանակերտն ու Բաքուն կկարողանան հանդես գալ հավասար հիմունքներով։

«Իշխանությունները ոչ միայն քարոզում են ինքնորոշման իրավունքը, այլ հրաժարվում են դրանից։ Հիմա այս երկխոսությունը իշխանությունների համար ժամանակ ձգելու  հնարավորություն է դառնալու, և այդ ձգումը ոչ թե մեր օգտին, այլ միայն Թուրքիայի և Ադրբեջանի պահանջների կատարման շահերից է բխում»,- ասաց նա։

Արծվիկ Մինասյանը նաև հավելեց՝ ինչ էլ անեն, դանդաղ մահվան է տանելու: