Մակրոնը կոչ է արել Ալիևին վերադառնալ հրադադարի ռեժիմի պահպանմանը

Ֆրանսիայի նախագահ Էմանուել Մակրոնը երեքշաբթի Ադրբեջանի նախագահ Իլհամ Ալիեւի հետ հեռախոսազրույցում կոչ է արել նրան վերադառնալ հրադադարի ռեժիմի պահպանմանը Հայաստանի հետ ռազմական բախումներից հետո, հայտնում է Ելիսեյան պալատը։

«Մակրոնը նախագահ Ալիեւին հայտնել է ռազմական գործողությունները դադարեցնելու եւ հրադադարին վերադառնալու անհետաձգելիության մասին: Նա պնդել է Հայաստանի եւ Ադրբեջանի միջեւ բանակցային ջանքերը շարունակելու եւ ակտիվացնելու անհրաժեշտությունը եւ հիշեցրել է բոլոր գործընկերների, մասնավորապես՝ Եվրամիության հետ դրան նպաստելու իր պատրաստակամությունը,»,- ասված է նախագահի հաղորդագրությունում։

Փաստաթղթում նշվում է, որ Մակրոնը խիստ մտահոգություն է հայտնել երկու երկրների սահմանին ռազմական գործողությունների, այդ թվում՝ հայկական բնակավայրերի ռմբակոծման կապակցությամբ։

Երկուշաբթի լույս երեքշաբթի գիշերը Մակրոնը հեռախոսազրույց էր ունեցել Հայաստանի վարչապետ Նիկոլ Փաշինյանի հետ։ Հանրապետության նախագահը կոչ էր արել խստորեն պահպանել հրադադարի ռեժիմը եւ հարգել Հայաստանի տարածքային ամբողջականությունը, հայտնում են պետության ղեկավարի գրասենյակից։

Սեպտեմբերի 13-ի վաղ առավոտյան իրադրությունը հայ-ադրբեջանական սահմանին կտրուկ սրվել է ։ ՀՀ պաշտպանության նախարարության հաղորդագրության համաձայն, Ադրբեջանը լայնածավալ ռազմական հարձակում է սկսել Հայաստանի հետ սահմանի միանգամից մի քանի հատվածներում: Կան զոհեր և վիրավորներ հայ զինծառայողների և խաղաղ բնակիչների շրջանում։ Հայաստանի վարչապետ Փաշինյանը, ելույթ ունենալով խորհրդարանում, հայտնել է հայկական կողմից առնվազն 49 զոհի մասին:

Երեւանը քննարկել է ԵԱՀԿ Մինսկի խմբի անդամ երկրների հետ սահմանին տիրող իրավիճակը: Հայաստանի իշխանությունները որոշել են դիմել Ռուսաստանի Դաշնությանը, ՀԱՊԿ-ին եւ ՄԱԿ-ի ԱԽ-ին։