Բունդեսթագում քննարկվում է Հայոց ցեղասպանության ճանաչման մասին բանաձևը

Գերմանիայի Բունդեսթագում ընթանում է Հայոց ցեղասպանության մասին օրինագծի քննարկումը: Խորհրդարանի նիստին ներկա է նաև Գերմանիայի կանցլեր Անգելա Մերկելը:

«Գերմանիան մեղքի իր բաժինն ունի այդ տարիներին կատարվածում»,- իր ելույթի ընթացքում ասել է Բունդեսթագի նախագահ Նորբերթ Լամերթը։ Ըստ նրա՝ իրական խաղաղություն չի կարող լինել, եթե չի վերականգնվել Ցեղասպանության զոհերի սերունդների համար արդարությունը։ «Օրհան Փամուկն ու Հրանտ Դինքն արժանի են, որ այսօր ստանան մեր աջակցությունը»,- հավելել է նա, tert.am-ը:

Ավելի վաղ Գերմանիայի նախագահ Յոախիմ Գաուկը 1915թ. Օսմանյան կայսրությունում հայերի զանգվածային սպանդն անվանել է ցեղասպանություն և տեղի ունեցածի համար պատասխանատվության մի մասը դրել է Գերմանիայի վրա, հաղորդում է Deutsche Welle պարբերականը: Ապրիլի 23-ին ելույթ ունենալով Բեռլինի մայր տաճարում՝ Գերմանիայի ղեկավարը դուրս է եկել իշխող դաշինքի ձևակերպումների շրջանակից:

«Տվյալ դեպքում մեր՝ գերմանացիներիս առաջ, կանգնած խնդիրն է վերանայել տեսակետը իրադարձությունների վերաբերյալ, երբ խոսքը գնում է հայերի ցեղասպանության համար պատասխանատվության, նույնիսկ հնարավոր է՝ մեղքի չափաբաժնի մասին»,- ասել է նախագահը՝ նկատի ունենալով Կայզերական Գերմանիայի զինվորականության մասնակցությունը 1915թ. տեղի ունեցած իրադարձություններում, հայտնում է civilnet-ը:

Գաուկի խոսքով՝ «հայերի ճակատագիրը զանգվածային հաշվեհարդարի, էթնիկ զտումների, տեղահանությունների և նույնիսկ ցեղասպանության պատմական ցայտուն օրինակ է»: Նույն այս ձևակերպումը օգտագործվում է նաև հայտարարության մեջ, որը պատրաստել են Բունդեսթագի իշխող խմբակցությունները և որը ապրիլի 24-ին կդրվի քննարկման:

Հիշեցնենք, որ Թուրքիայի վարչապետ Ահմետ Դավութօղլուն ապրիլի 23 հեռախոսազրույց էր ունեցել կանցլեր Անգելա Մերկելի հետ՝ խնդրելով վերջինիս ազդել Բունդեսթագի վրա, որպեսզի քննարկվող բանաձևը չընդունվի: