Խորհրդարանում բոլորը վերածվել են «հակահետախուզների» ու «թուրքերի որսորդների». Ռուբինյան

Հայաստանի խորհրդարանի փոխնախագահ, Թուրքիայի հետ բանակցություններում Հայաստանի հատուկ ներկայացուցիչ Ռուբեն Ռուբինյանն այսօր՝ հունվարի 18-ին, ափսոսանք է հայտնել, որ հայ-թուրքական հարաբերությունների կարգավորման գործընթացի քննարկումը տեղի է ունենում նաեւ մանիպուլյացիաների ալիքի պայմաններում: Մասնավորապես, Ռուբինյանն անդրադարձել է այն մեղադրանքներին, թե ինքը «թուրքական ազդեցության գործակալ» է։

Նա նշել է, որ Հայաստանի քաղաքական դաշտի գլխավոր և հիմնական խնդիրը վերջին տասնամյակներում եղել և մնում է «քաղաքական երեսպաշտությունը»: «Խնդիր կա, քանի որ որոշ քաղաքական ուժեր, կախված քաղաքական կոնֆիգուրացիայից, հանդես են գալիս հակադիր քաղաքական դիրքերից՝ փորձելով կապիտալիզացնել հասարակության հուզական վիճակը եւ վախերը», - հայտարարել է Ռուբինյանը:

Նրա խոսքով, ընդդիմությունը եւ /կամ նրա հետ փոխկապակցված գործիչները եւ լրատվամիջոցները փորձում են կասկածների, շահարկումների եւ մանիպուլյացիաների միջոցով այն ներկայացնել որպես «կասկածելի կապեր ունեցող մարդ»:

«Օրինակ, տիկին Խամոյանը ("Հայաստան" դաշինքի անդամ Ագնեսա Խամոյան – խմբ.) նախօրեին փորձել է ակնարկել, որ ես, հնարավոր է, թուրքական ազդեցության գործակալ եմ», - հայտարարել է նա՝ հիշատակելով ՀՅԴ դաշինքի մեջ մտնող «Դաշնակցություն» կուսակցության գործողությունները անցյալ դարասկզբին Հայոց ցեղասպանության առաջ, ինչպես նաեւ մատնանշելով «Թուրքիայի հետ գաղտնի բանակցությունների առկայությունը, որոնք սկսվել են Հայաստանի երկրորդ նախագահ եւ «Հայաստան» դաշինքի առաջնորդ Ռոբերտ Քոչարյանի օրոք»:

Նա վստահ է՝ տրամաբանությամբ, որի հիման վրա իրեն անվանում են Անկարայի ազդեցության գործակալ, գործակալներին կարելի է դասել նաև նախկին տարիների մի շարք անվանի դաշնակցականների և ժամանակակից քաղաքական գործիչների, որոնք երկխոսություն էին վարում Թուրքիայի հետ։

Նա նշել է, որ նման մանիպուլյացիաները եւ փոխադարձ մեղադրանքներն արդյունքում կհանգեցնեն նրան, որ հասարակությունը կդադարի լրջորեն դիտարկել խորհրդարանը: «Մարդիկ պարզապես կդադարեն հետևել քաղաքականությանը։ «Թուրք», «գործակալ», «դավաճան»: Դե հասկացանք, դե! Այս խորհրդարանում բոլորը վերածվեցին «հակահետախուզների», թուրքերի որսորդների ... Լավ, բա ուր ենք գնալու։ Կոչ եմ անում բոլորին՝ եկեք վերադառնանք բովանդակային դաշտ»,-հայտարարեց ԱԺ փոխնախագահը։