2022թ. հոկտեմբերի 6-ին մենք Ադրբեջանի հետ պայմանավորվել ենք Ալմա-Աթայի հռչակագրի հիման վրա միմյանց տարածքային ամբողջականությունը և ինքնիշխանությունը ճանաչելու վերաբերյալ, և որ Ալմա-Աթայի հռչակագիրը պետք է դրվի սահմանազատման գործընթացի հիմքում: Այս մասին Հանրային հեռուստաընկերությանը տված հարցազրույցում հայտարարեց ՀՀ վարչապետ Նիկոլ Փաշինյանը: "Հիմա շատ կարևոր է, որ մենք նաև գործնականում ի ցույց դնենք մեր հավատարմությունն այդ գործընթացին, իհարկե կարևոր է, որ Ադրբեջանը նույնպես դա ի ցույց դնի": Նրա խոսքով, ներկայումս ՀՀ ինքնիշխանության և զարգացման մի կարևոր անկյունաքար է դրվում, սա "անկյունաքար է մեր պետության երկարաժամկետ գոյության համար": Նա հիշեցրեց, որ դեռ 2020 թվականին է հայտարարել, որ առաջիկա տարիները վճռորոշ տարիներ են ՀՀ համար, և հենց հիմա մեր աչքի առաջ դա է տեղի ունենում. "Առաջիկա տարիները մեր պետության համար վճռորոշ նշանակություն ունեն, և եթե մենք առաջիկա տարիներին կարողանանք պահպանել մեր պետականությունը, ինքնիշխանությունը, անկախությունը՝ կկարողանանք երաշխավորել, որ առաջիկա տասնամյակներում Հայաստանի Հանրապետություն, անկախ պետությունը գոյություն կունենա",- ասաց նա: Փաշինյանը շեշտեց, որ Տավուշում չորս գյուղերի դելիմիտացիայի չկարգավորված լինելը Ադրբեջանին կարող է էսկալացիայի ավելի շատ առիթներ ու հնարավորություններ տալ, քան այս խնդրի լուծումը:
