Հայաստանում «Ինտեգրացիոն բարոմետր» հետազոտական ծրագրի հանրային կարծիքի ուսումնասիրությունների արդյունքների համաձայն հանրապետությունում հարցմանը մասնակցած 1105 քաղաքացիների 86.1 տոկոսը Հայաստանի բարեկամ երկիր է համարում Ռուսաստանին, 30.3 տոկոսը՝ Ֆրանսիային, 29. 6 տոկոսը՝ Վրաստանին: Այս մասին լրագրողների հետ հանդիպմանը հայտնեց Մարքեթինգի հայկական ասոցիացիայի նախագահ Արամ Նավասարդյանը։ Հարցվածների 9 տոկոսից ավելին կարծում է, որ Հայաստանին բարեկամ երկիր է ԱՄՆ-ն, 7 տոկոսից ավելին՝ Գերմանիան, 5 տոկոսից ավելին՝ Ուկրաինան, 4 տոկոսից ավելին՝ Բելառուսը, 2 տոկոսից ավելին՝ Չինաստանը եւ Ղազախստանը, 1 տոկոսից ավելին՝ Հնդկաստանը, Մեծ Բրիտանիան, Մոլդովան։ Նվազագույն տոկոս են կազմում Միջին Արեւելքի երկրները, Տաջիկստանը, Թուրքիան, Ուզբեկստանը, Թուրքմենստանը, փոխանցում է News.am-ը: Հարցվածների 8.3 տոկոսը կարծում է, որ Հայաստանը բարեկամ երկրներ չունի։ «Ինտեգրացիոն Բարոմետր» հետազոտական ծրագիրն անցկացվում է արդեն չորրորդ տարին՝ դեմ առ դեմ հարցումների մեթոդով, ըստ սեռի, տարիքի եւ բնակության վայրի։