Դժվար է հասկանալ հայ տղամարդկանց այն քայլը, երբ իրենց կողքին ստիպողաբար պահում են կնոջը, այն էլ բուժքրոջ, ով, եթե չասենք իր առաքելությամբ, ապա գոնե մասնագիտության և աշխատանքի բերումով մշտապես աջակցություն ու բժշկական օգնություն է ցուցաբերել դրա անհրաժեշտությունն ունեցողներին։ Այս մասին ասված է ՀՀ առողջապահության նախարարության հայտարարության մեջ: ԱՆ-ը հիշեցնում է, որ արդեն 52 ժամ է, ինչ շտապ բուժօգնության երկու բժիշկը և բուժքույրը ոստիկանության պարեկապահակային ծառայության գնդի տարածքում պատանդի կարգավիճակում են։ Երեկ նրանց ազատ արձակելու բազում կոչերին միացան նաև Երևանի մի շարք բժշկական կազմակերպությունների բժիշկներն ու բուժքույրերը` շեշտը դնելով հատկապես իրենց գործընկերուհու` բուժքույր Մալինա Մարգարյանին ազատելուն։ ՀՀ առողջապահության նախարարությունը ևս մեկ անգամ դատապարտում է զինյալ խմբի կողմից բուժաշխատողներին պատանդ վերցնելու ամբողջ աշխարհում անընդունելի համարվող քայլը, կոչ է անում հային վայել մոտեցում ցուցաբերել և առաջին հերթին ազատ արձակել բուժքրոջը։ Միաժամանակ, հորդորում ենք սառը տրամաբանությամբ ընդունել առանց որևէ նախապայմանի բոլոր բուժաշխատողներին ազատ արձակելու բազում հորդորները, կոչերն ու պահանջները։ Ողջ աշխարհում գրված ու չգրված օրենքներով չընկալվող այս գործողությունը բնավ պատիվ չի բերում ոչ ձեր արժանապատվությանը և ոչ էլ ձեր կողմից ներկայացվող գաղափարներին։ Ինչպես ավելի վաղ VERELQ-ը տեղեկացրել էր՝ հուլիսի 27-ին ՊՊԾ գնդի տարածքում փոխհրաձգության հետևանքով վիրավորված զինված խմբի երկու անդամներին բուժօգնություն ցուցաբերելու նպատակով տարածծ մեկնած չորս բժիշկները պատանդ են վերցվել: Նրանցից մեկին «Սասնա ծռեր» խումբն ազատ է արձակել:
