ՀՀ քննչական կոմիտեն մայիսի 15-ին վարույթ է ընդունել խուլիգանության դեպքի առթիվ ՀՀ ոստիկանությունում հարուցված քրեական գործը: Այս մասին հայտնում են ՔԿ-ի մամուլի ծառայությունից: Մայիսի 13-ին՝ ժամը 14:50-ին, ոստիկանության Նոր Նորքի բաժնում 62-ամյա տղամարդը հաղորդում, ապա բացատրություն է տվել այն մասին, որ նույն օրը՝ ժամը 14:20-ի սահմաններում, Երևան քաղաքի ընդհանուր իրավասության դատարանի Ավան և Նոր Նորքի նստավայրում մի խումբ անձինք տվել են հայհոյանքներ, քաշքշել են իրեն՝ կատարելով այլ բռնի գործողություններ և ջրի տարայով մեկ անգամ հարվածել են դեմքին՝ պատճառելով մարմնական վնասվածք: Դեպքի առթիվ Ոստիկանության Նոր Նորք բաժնում հարուցվել է քրեական գործ՝ ՀՀ քրեական օրենսգրքի 258-րդ հոդվածի 3-րդ մասի 1-ին կետի հատկանիշներով: Ձեռնարկվում են համապատասխան քննչական և դատավարական գործողություններ՝ դեպքի բոլոր հանգամանքները բազմակողմանի, լրիվ և օբյեկտիվ հետազոտելու ուղղությամբ: Նախաքննությունը շարունակվում է: Հիշեցնենք, որ Ռոբերտ Քոչարյանի խափանման միջոցի գործով նիստի ընթացքում Վարդգես Գասպարին բողոքի ակցիա էր իրականացնում դատարանի դիմաց՝ «Ռոբիկ սրիկա, Ռոբիկ մարդասպան» պաստառով եւ նույնը վանկարկելով: Սակայն Քոչարյանի աջակիցները նրա ձեռքից վերցրել եւ պատռել էին պաստառը, ապա ջրով լի շշով հարվածել էին նրա դեմքին: Միեւնույն ժամանակ FB օգտատերերը հիշեցնում են, որ շուրջ մեկ տարի առաջ նմանատիպ գործողություն կարատեց ԱԺ պատգամավոր Սասուն Միքայելյանը Լևոն Երանոսյանի նկատմամբ, սկայան այդ ժամանակ քրեական գործ չհարուցվեց: «Լուսանկարում Սասուն Միքայելյանը ջրի շշով հարվածում է գեներալ լեյտենանտ Լևոն Երանոսյանին: Այսօր իմացա, որ նույն գործողության համար որը ենթադրաբար կատարվել է Վարդգես Գասպարիի նկատմամբ հարուցվել է քրեական գործ խուլիգանության երկրորդ մասով: Հիմա ինչ, ուզում եք ասեք Սասունը խուլիգան ա՞ Բռնությանը դեմ եմ, եթե պատժում են, պարտադիր երկուսին էլ պետք է պատժեն», - նշում է ակտիվիստ Նարեկ Մալյանը: